Festîvala Tîyatroyî ya Mîyanneteweyî ya Amedî de do welatanê sey Ukrayna, Rusya, Îsraîl, Filistîn, Azerbaycan û Armenîstan ra grubê tîyatroyî bêrê têhet, kayanê xo yê vera şerî pêşkêş bikerê û bi rayîrê hunerî mesajê dîyalogî bidê.
Tîyatroyê Şaristan ê Amedî bi hemkarîya Enstîtuya Tîyatroyî ya Mîyanneteweyî (ITI Worldwide) reya ewile festîvalêka tîyatroyî ya mîyanneteweyî kena. Festîvala Tîyatroyî ya Mîyanneteweyî ya Amedî ya 11. Do mabênê 24ê nîsane û 2ê gulana 2026î de bi sloganê “Seba Aştî Dîyalog” de bêra kerdene.
Kaykerê Tîyatroyî Yavuz Akkuzu derheqê na festîvale û amadekarîyanê aye de ajansê ma rê qisey kerd.
Na festîvale tena şayîyêk nîya
Kaykerê tîyatroyî Yavuz Akkuzu dîyar kerd ke prosesêko hende muhîm de do Amed de dets bi programêko muhîm bikerê û vat ke festîvale de do welatanê sey Ukrayna, Rusya, Îsraîl, Filistîn, Azerbaycan û Armenîstan ra grûbê tîyatroyî bêrê têhet, kayanê xo yê vera şerî pêşkêş bikerê û bi rayîrê hunerî dîyalog awan bikerê. Yavuz Akkuzu da zanayene ke amancê înan o yo ke grûbanê tîyatroyî yê welatanê ke tede şer dewam keno, înan bîyarê têhet û wina vat: “Ma wazenê dewletê ke şer de yê, grûbanê înan bîyarê Amed û bi kayanê vera şer, mesajêk bidê. Şer çîyanê negatîfan vejenıo orte, ma aştî wazenê. Ma wazenê Amed bibo merkezê dîyalogê aştî. Tîyatroyê Kurdkî zî do nê mesaj û prosesî de bi wayîrê rolêko sereke, wirzîyo.”
Seba Rojhelatê Mîyanên û dinya mesajê dîyalogî
Akkuzu da zanayene ke her kay do bi Kurdkî, Îngîlîzkî û Tirkî bêro nuştene ke mesaj bireso her kesî û nê çîyî vatî: “Na festîvale tena seba Amed ney, seba Rojhelatê Mîyanên û dinya mesajêko hêvîdar a. Hunermendî şer nêwazenê, ê aştî wazenê. Tîyatroyê Kurdkî do merkezê dîyalogî de bibo û Amed do bibo merkezê aştî û hunerî.
Piştgirîya mîyanneteweyî
Sereka ITI Worldwide Dr. Jessîca Atwookî Kaahwa û Marharyta Korniushxhenko Ukrayna ra beşdarê kombîyayîşanê amadekarîye bîye û piştgirîya xo pare kerde. Kombîyayîşo gird ê destpêkî Berlîn de ame kerdene. Xebatê ekonomîyî yê festîvale dewam kenê. Amanc o yo ke dewlete û sponsorî hetkarîye bikerê. Heta nika 20 welatan rê mektub ame erşawitene û zafaneyê cewaban pozîtîf bîyo. 20 welatan ra vêşêr grûbî do beşdarê festîvale bibê. Heta nika 15 grûban beşdarbîyayîşê xo yê festîvale qebul kerda. Yeno waştene ke 20-25 grûbî amade bibê. Atolye û panelê vera şer zî do seba wendekar û ciwanan bêrê kerdene.”
