Şaredarîya Amedî ya Şaristanê Girdî seba ke gedeyan girêdayîşê dîjîtalî ra dûrî biko, Taxê Hantepe de “Şayîya Huner û Sporî ya Gedeyan” organîze kerd.
Serekîya Daîreya Xizmetê Komelkîyan, Serekîya Daîreya Xizmetê Ciwan û Sporî û Serekîya Daîreya Karê Kulturî û Komelkîyan pîya seba gedeyan “Şayîya Huner û Sporî ya Gedeyan” viraşte. Şayîya ke Taxa Tilham a Qezaya Yenîşehîrî de ameye organîzekerdene, tede bi seyan gedeyî beşdar bîyî û keyf kerd.
Muzîk û spor têreyde
Çalakî de ke Mudirîya Şûbeyê Gedeyan a Serekîya Daîreya Xizmetê Komelkîyan organîze kerdo; ritîm, resim, tenîsê masa, voleybol, parkurê bisîkletan sey xebatanê sporî, sewbîna trambolîn, kayê aqil û zîhnî, kayê verênî yê kuçeyan, boyaxkerdişê rîyan û zaf parkurê keyweşî tede ca girewtî.
Ma do nê xebatan dewan de zî bikerê
Sereka Daîreya Xizmetê Komelkîyan Serap Yildirim va “Ma wazenê ke gedeyê ma ekranan ra dûrî bimanê coka ma nê tewir çalakîyan virazenê. Ma do nê xebatan dewan de zî bikerê.”
No roje ez qet xo vîr ra nêkena
Gedeyan zî va ke înan zaf keyf kerdo û wazenê ke nê çalakî dewam bikê. Dicle Koyuncu va “Ez zaf keyfweş a ke şima ameyî tîya. Ma parkuran de kay kerd, bisîklet ramit, resimî viraştî.” Ayşe Atli zî va “Na roja ke mi vîyarna ez qet xo vîr ra nêkena. Ez sipas kena ke şima bi muzîk û çalakîyanê xo ma zaf keyweş kerdî.”
