Amedijan dîyar kerd ke zêdekerdena heqê raye ganî peyde bêro girewtene. Vanê ke: “Şarê ma xizano nêeşkeno handê peran bido.
Merkezê Koordînasyonê Ameyîş û Şîyayîşê yê Amedî 6ê gulane de Şaredarîya Girde yê Şaristanê Amedî de kom bî. Kombîyayîş ra dima hêqê raye se de 25 zêde kerd. Heqê raye yê dolmîşan 20 lîra ra vejîya 25 lîrayî. Heqê raya wendekaran zî 12 lîreyan ra vejîya 15 lîreyan. Heqê raye seba otobusanê şaredarîye û otobusanê taybetan zî bî zêde. Otobusan de zî heqê raye 15 lîreyan ra vejîya 20 lîreyan. Heqê raya otobusan yê wendekaran zî 8 lîreyan ra vejîya 10 lîreyan. Welatijan seba buhabîyena heqê raye nêrazîbîyayena xo nîşan dê û va şarê ma xizan o nêeşkeno otobus û dolmîşan ra suwar bibo.
‘Heqê otobusan tayêna kemî bo handê başo’
Welatij Orhan Altanî nêrazîbîyena xo wina nîşan dê û vat: Heqê otobusan çendêk tayêna kemî bo semedê însanan handê başo. Nika ma onîyenê yakit zaf buha yo. Hukmat gerê inî yaqitî rê yew çare bivîno. Her roj her çikra zam yeno. Enflasyon zaf o. Waxto ke enflasyon zêde bo ina beno. Çaw nêeşkeno çik biko. Polîtîkayê hukmatî baş nîyê. Eke baş bibiyêne ina nêbîyêne. 2010î de dolar çendik bî? 1,5 bî, inkê dolar çendêko 38î vêreno. Çendek ferq esta ma vaj 30 qat. A roje ra na roje 30 qat ra zafêrî zam amo. Dolar eke ina bibo; demir beno buha, beton beno buha, non beno buha, yaqit beno buha. Her çî beno biha. İnka ma vajim çi. Suc miletê ma de nîyo. Suc ino merdimo ke îtîya de xewetîno ey de zî nîyo. Suc hukmatî de ro. Polîtîkayanê hukmatî de ro.
Oranê faîzî zaf a, waxtoke faîz zaf bo ticaret zî nêbeno. Pîyase bena vindete. Çaw tîcaret nêkero o wext milet vêşan maneno. Inî faîzî gerê ma hal bikime.”
‘Kes zamî peyde nêgêno, ma heq kerdo’
Welatij Şîyar Erdoganî zî wina va: “Xo ra mi dî nêdî zam yeno. Mi dî nêdî ino tewro. Ne tiramvay virazenê îtîya de. Gava tiramvayî virazîyê milet beno rehet. Milet kûno araban, arabayî xo ra dekerdîyê. Gava araba dekerde bo ti senîn şina zerreyê ci. Ne aqil est o ne mantix est o.
Nê nê kam zamî peyde gêno. Yew milet eke soz xo yew nêkero senîn zamê araban peyde bêro girewtene. Wa bêro hîna zam bero, heta ça yeno se wa bêro. İno milet heq keno.”
