Amerîka bi rayîrê Pakistanî şertê destpêkerdişê pêvînayîşî Îranî rê şawitî. Îranî îdîayê “Îran pêvînayîş wazeno” red kerd û ewro zî bi roket û dronan Erebîstana Siûdî û Kuweytî ser o hêrîş kerd.
Goreyê agahîya rojnameyê New York Timesî Amerîka seba ke pêvînayîşê qedîyayîşê şerê Îranî dest pêbikero, 15 babetî bi rayîrê Pakistanî şawitî Îranî. Plano ke bi rayîrê Pakistanî Îranî rê ameyo şawitene babetê bernameyê roketanê balîstîk û nukleeran ê Îranî û babetanê Tengawa Hurmuzî ser o yo.
Goreyê raporê N12 Newsî ke behsê hîrê çimeyanê agahdaran keno, Amerîka fikrîyeno ke agirbestêko yew aşmane îlan bikero û ê demî de muzakereyî bêrê kerdene. Goreyê plana 15 babetan heme kapasîteyê nukleerî yê Îranî ganî bêrê vengkerdene, Îran soz bido ke fek xebatanê xo yê nukleeran ra verdano û heme uranyumo dewlemendkerde Îranî ra bêro vetene.
Serekê Amerîka Donald Trumpî vizêrî Ofîsê Ovalî de rojnamegeran ra vat ke muzakereyê mabênê Amerîka û Îranî dewam kenê û Îran “bi raştîye” wazeno bireso peymanêk. Trumpî vat: “Ma bi raştîye bi merdimê raştî reyde qisey kenê û ê hende peymane wazenê ke şima nêeşkenê bifikryê ke çira hende wazenê.”
Wezaretê Pawitişî yê Siûdî da zanayene ke Erebîstana Siûdî hîrê dronê çekdarê Îranî vistî war. Goreyê agahîya Reutersî Sazgeha Hewayî ya Sîvîle ya Kuweytî zî ewro serê sibayî da zanayene ke dronêk embarê sotemenî yê Teyaragehê Mîyanneteweyî yê Kuweytî de kewt war û bî sebebê adirî la ziyanê ganî nêbîyo. Eşkerayîye de dîyar kerd ke prosedurê awarteyî lez aktîf kerdî û ekîbanê peysnayîşî mudaxeleyê adirî kerd.
