Partîya Yewîya Armenîyan vera dûrvistişê armenîyan ê weçînayîşanê Meclîsê Şarî nerazîbîyayîş mojna û dîyar kerd ke ganî pêro temsîlkarî bi hawayêko têduşt û adîl bêrê temsîlkerdene.
Partîya Yewîya Armenîyan derheqê weçînayîşanê Meclîsê Şarî yê Sûrîye de eşkerayîyêk weşanaye. Partî endîşeyê xo yê seba prosesê weçînayîşanê Meclîsê Şarî û komîteyanê girêdayeyê ci îfade kerdê. Partî eşkerayîta xo de dîyar kerd ke armenî parçeyêkê heqîqî yê komelê Sûrîye yê, labelê tewrbîyayîş û temsîlkarîya sîyasî ra yenê dûrvistene.
‘Binpaykerdişê edaletê neteweyî yo’
Partî da zanayene ke dûrvistişê armenîyan binpaykerdişê rêgêzanê edaletê neteweyî yo, na rewşe tesîrêko negatîf meşrûîyetê xebatanê sîyasîyan û ameyoxê temsîlkarîya neteweyî ya welatî ser o kena. Partîya Yewîya Armenîyan eşkerayîya xo de waşt ke şaristananê Hesekê, Reqa, Dêrazor, Şam û Helebî de temsîlkarîya komelê armenîyan Meclîsê Şarî de biba û nê waştişî îfade kerdê: “Ganî heqê armenîyan ê weçînayîşê temsîlkaranê xo bibo. No garantîkerdişê edaletî yo.”
‘Asûrî û kurdî zî ameyê peygoşkerdene’
Partî sewbîna bale ant çinbîyayîşê temsîlkarîya asûrîyan ser o û dîyar kerd ke asûrî zî temsîlîyetêkê eslî yê herêma Cizîrî yê. Partî, şeklê barkerdişê kursîyanê weçînayîşî yê seba temsîlkaran red kerd û da zanayene ke komelê kurd û yê bînî zî nê prosesî de ameyê peygoşkerdene.
‘Bingeyê Sûrîyeyêka newe temsîlkarîya adîlane yo’
Partîya Yewîya Armenîyan dîyar kerd ke serkewtişê her prosesêkê weçînayîşê demokratîkî bi caardîşê temsîlkarîyêka adîl û hemseng a seba pêro komel, dîn û bawerîyan reyde girêdaye yo. Partî eşkerayîya xo bi nê vatişan qedênaye: “Ganî Sûrîyeya newe bingeyê hemkarîya neteweyî, rêzgirewtişê seba cîyayîyan û garantîkerdişê heqanê sîyasîyan ê pêro komelan bêra awankerdene; tena bi nê qeydeyî yewîye û aramîya welatî eşkena bêra xurtkerdene.”
