Bi seserranê ke asurijan Rojeyê Nînova, gênê, çarçiweya no roje de zî 3 rojê asurijan werd û awe fekê xo ra nêronenê, peynîya rojeyî zî asurijan rojeyê xo bi Werdê Poxînî akenê.
Asurijan wayîrê şaristanîyêka zengîn û verên ê. Verba heme hêrişan kultur, edet, tarîx û şaristanîya xo pawitê. Asurijan zaf bawerîya xo ra girêdayê. Rojeyê Nînova zî deranê ortodoks û suryanî ra vila bîyo. Rojeyê Nînova, Iraq de vilabîyayişê virûsêkî ra girêdîyeno. Pîskoposê dêran seba vindertişê musîbetan qerar dayê ke no îbadet bikerê, armancê rojeyî, qednayişê virûsî bî. No dem ra nika no roje yeno girewtiş.
3 roj û 3 şanê domyeno
Homa, bi silgirîya Pexember Yunusî, şarê Nînova ra seba tovbekerdişê xeber erşawit la ê nêgoştaritê. Peynî zî Pexember Yunus seba şîyayişe Tarşîşî, keştîyêke ra venîşt la seba xelesyayişî xo, xo eşt behrî. Behrî de zî hutêke (balîna) Pexember Yunus girewt pîzeya xo, 3 roj û 3 şanê pîzeya xo de êsîr girewt û peynî zî hut Pexember Yunus berd qeraxî û uca de verada.
No ser xususî nînovayijan no rojeyî ra hîna bi girêdayê. 3 roj werd nêwenê. Peynîya rojeyî zî suryanijan Werdê Poxînî virazenê û mîyanê nê werdî de zî; sol, mercû, fasulye, xele, cew û dendikî est ê.
Her kes nêeşkeno 3 rojê, no roje bigo. No ser kesêk biwazo no roje bigo, eşkeno hetanê teştareyî zî vêşan û bêawe bimano. Demê rojeyî zî nêeşkenê goşt, şîr, mast û hake biwerê. Ganî werdê înan zî bi riwena zeytûnî bêro viraştiş. Her emrî ra merdim eşkeno no roje bigo, eke kesêkî demêko rojeyê xo bi Werdê Poxînî biakero, yeno bawerkerdiş ke do no kes bizewejî yo.
Aqubetê êzidîyan ame ser înan
Ser suryanijan zî sey şarê êzidî her tim hêriş ameyo. Tewro peynî çeteyê DAIŞ’î hêrişê înan kerdê û bi hezaran suryanij ya kiştî ya zî remnayê. Nika suryanijan wazenê welatê înan de aştî bibo û ê zî biagêrê welatê xo.
