Sekreterê Komîsyonê Ziwanê Kurdkî yê Baroyê Wanî Alî Şapkaci behsê prosesê aştî kerd, bale ant muhîmîya bingeyêkê huqûqî ser o û vat: “Cayê çareserî parlamento yo. O semedî ra parlamento de ganî komîsyon bêro awankerdene.”
Rayberê Şarê Kurdî Abdullah Ocalanî 27ê sibate de vengdayîşê “Aştî û Komelo Demokratîk” kerd. No vengdayîş pêroyê dinya de bi rojan bi rojev û vakurê Kurdîstan û Tirkîya de zî xeylê ame qiseykerdene. Vengdayîşî ra pey Partîya Karkeranê Kurdîstanî (PKK) zî 5 û 7ê gulane de Kongreya xo ya 12. viraşte û 12ê gulane de encamnameyê kongreya xo pare kerd. Goreyê encamnameyê PKK’yî xo fesih kerd. Nê rojanê peyênan de seb averberdişê prosesî vengdayîşê awankerdişê komîsyonêk yeno kerdene û seba qanûnêko newe xebatî yenê kerdene.
Sekreterê Komîsyonê Ziwanê Kurdkî yê Baroyê Wanî avûkat Alî Şapkaci ajansê ma (AW) rê prosesê aştî hetê huqûqî ra erjna û bale ant muhîmîya bingeyêko huqûqî ser o û wina vat: “Nê babetan de bi taybetî seba ziwanê Kurdkî ma eştişê gamanê wêrekan ke do dewlete bierza, hewcedar vînenê. Seba ke kakilê nê meseleyî wayîrvejîyayîşê ziwanî yo. Helbet seba ke serkewtişê prosesanê winasîyan, bingeyêko huqûqî qasê îradeyo sîyasî muhîm î û xora Vakur de tecrubeyê sîyasî nîşan danî ke demo ke prosesanê winasîyan de bingeyêko huqûqî nêro amadekerdene, proses yan nêmcet maneno yan zî venganeyê pîlî pey xo de verdano. Muhîmîya nê çîyî Birêz Ocalan zî behs kerd. Vat seba çekronayîşî zî helbet ganî bingeyêko huqûqî bêro awankerdene.”
Nimûneyê aştî yê Ewropayî
Alî Şapkaci bale ant nimûneyanê dinya û dîyar kerd ke Ewropa de nimûneyê aştî yê winasînî est ê û wina qisey kerd: “Demê muzakerayanê dewleta Spanya û Rêxistina ETA’yî reyde ke têkoşînê çekdarî ra fek verado, babetanê sey rewşa girewteyan, şertê kesanî ke ceza werda û azadîya raman de reformê cidî yê huqûqî ameyê kerdene. Reyna prosesê çareserî yo ke IRA Îngîlîstanî reyde rayra berdêne, tena waştişê sîyasî nê, mekanîzmayê huqûqî yê newe ra muhakekerdişî ameyê caardene. Nê nimûneyê nîşanê ma danî ke aştîya menda tena bi çekan nêbena û ganî bingeyêko huqûqî zî est bo.”
‘Ganî parlamento de komîsyonêk bêro awankerdene’
Alî Şapkaci seba çareserî parlamento nîşan da û wina vat: “Destpêkerdişê nê prosesî û seba encamgirewtişê nê çekronayîşî cayê çareserî parlamento yo. O semedî ra ganî parlamento de komîsyono ke çend kesan ra yeno pê, bêro awankerdene. Ê dîyîn ganî komîsyono ke muşahadeyê huqûqî bikero, bêro awankerdene. Ganî raporê perîyodîkî problemanê sey binpaykerdişê heqan, girewtişan û astengîyê vernîya ziwanê Kurdkî û azadîya îfadeyî ser o bêrê amadekerdene û weşanayene. Ê hîrêyin ganî seba girewteyanê sîyasîyan qanûnê bicakerdişê newe ra bêra sazkerdene. Sewbîna ganî cezayê muteqî yê sey cezayanê zindankerdişê sermed ê girankerdeyan û heqê hêvî newe ra bêrê erjnayene.”
‘Ganî bingeyêko huqûqî bêro amadekerdene’
Alî Şapkaci ard vîrî ke qiseykerdişê rojane û jargono sîyasî heta astêk eşkeno bibo prosesanê winasînan bidomno, demêkî ra pey xetimîyeno. Alî Şapkaci îfade kerd ke nê semedî ra ganî bingeyêko huqûqî ke têduştî û qanûnê aqlî xo de hewîneno, bêrê amadekerdene û wina qedêna: “Sey Baroyê Wanî ma vanî ke ganî sazî û dezgehê huqûqî û aştîwazî zî nê prosesî de ca bigîrê û ma hêvî kenî ke aştîyêka biedalet û menda biba.”
