Avûkat Ezio Menzioneyî îfade kerd ke ganî dewleta tirke game bierza û vat: “Ganî dewleta tirke Ocalano ke garantîyê prosesî yo û girewteyanê sîyasîyan verada. Na game do biba nîşaneya samîmîyetê ci.”
Avûkatê îtalyanî Ezio Menzioneyî derheqê Vengdayîşê Rayberê Şarê Kurdî Abdullah Ocalanî, Kongreya PKK’yî û prosesê peyêne de ajansê ANF’yî rê qisey kerd.
Menzioneyî îfade ke qerarê Kongreya PKK’yî seba çareserîya demokratîke ya meseleyê kurdan zaf pozîtîf ê û ganî Erdogan verê ney de gamanê pozîtîfan bierzo. Menzioneyî vat: “Qerarê kongre manadar ê. Aştî bi beşdarîya her di hetan bena. Êdî ganî dewlete game bierza. Erdoganî bi xo hema zî eşkerayîyêk nêdaye. Rixmê qeraranê kongre zî Ocalan hema zî tepişte yo. Birêz Ocalan garantîyê prosesî yo û ganî ca de veradîyo. Ocalan do bieşko qeraranê kongre bikero dewre.
Dewlete pabeyê çi ya? Wa Ocalan veradîyo. Seke Bahçelî zî waşt ganî Ocalan şêro Meclîs de qisey bikero. Ganî girewteyê sîyasî yê bînî zî veradîyê. Eke Tirkîya raşta zî wazena kurdan de pêbikera ganî nînan bikera. Çira hemşaredar û sîyasetmedarê kurdî hema zî girewte yê? Eke PKK çin bo tehdîtêk zî do çin bo. Yanî ganî dewleta tirke gamanê zelalan bierza.”
Menioneyî îfade kerd ke ganî Ewropa û Amerîka tewirê xo yê vera PKK’yî bibedilnê û vat: “Na rêxistine ha xo qedênena. Ganî tewirê vera ci bibedilîyo.”
