Avûkatanê Buroyê Hiqûqî yê Seserrî seba ke muwekîlê xo Rayberê Şarê Kurdî Abdullah Ocalanî reyde pêvînayîş bikerê, muracatê Serdozgerîya Bûrsayî û Mudirîyê Hepisxaneyê Îmraliyî kerd.
Avûkatanê Bûroyê Hiqûqî yê Seserrî ra Rezan Sarica, Raziye Ozturk, Ozgur Faîk Erol ve Mazlum Dînç semedê pêvînayîşê bi Rayberê Şarê Kurdî Abdullah Ocalan ke Hepisxaneyê Girewte yê Tîpê F’yî yê Ewleyîya Berze yê Îmraliyî de yeno girewtene, muracatê Serdozgerîya Komare ya Bursayî û Mudirîya Hepisxaneyî Îmraliyî kerd.
Avûkatê Bûroyê Hiqûqî yê Seserrî ra Ozgur Faîk Erol, tewro peynî 27ê Sibate de pêvînayîşê Abdullah Ocalan, Omer Hayrî Konar, Hamîlî Yildirim û Veysî Aktaşî de ca girewtbî. Heto bîn ra avûkatan semedê pêvînayîşê Omer Hayrî Konar, Hamîlî Yildirim û Veysî Aktaş zî hem muracatê dozgerî û hem zî mudirîya hepisxaneyî kerd.
Cewabê xeylê serdayîşanê semedê pêvînayîşê Abdullah Ocalanî, Omer Hayrî Konar, Hamîlî Yildirim û Veysî Aktaşî nêyeno dayene. Pêvînayîşî her 6 aşmî ra reyêk hetê Dadgerîya Înfazî ya Bursayî ra bi sebebê “cezaya disiplînî” yenê astengkerdiş.
