Avukatanê Hemserekê HDP’yî yê verênî Selahattîn Demîrtaş qerarê DMME’yî ra pey seba veradayîşê miwekîlê xo muracatê Mehkemaya Îstînafî ya Anqara kerd.
Mehkemaya Heqanê Merdiman a Ewropayî (DMME) vizê reyêka bîne derheqê Hemserekê Pêroyî yê HDP’yî yê verênî Selahattîn Demîrtaşî de qerarêko newe da. DMME’yî îtîrazê Tirkîya yê derheqê Demîrtaşî de red kerd û bi redkerdişê îtîrazî ame dîyarkerdene ke girewtişê Demîrtaşî vera qerarê heqanê merdiman o. Bi nê qerarî teqez bi ke ganî Demîrtaş hepisxane ra vejîyo.
Qerarê DMME’yî ser o avûkatê Demîrtaşî seba tehlîyeya miwekîşê xo muracatê Mehkemaya Îstînafî ya Anqara kerd. Çimê raya pêroyî nê muracatî de yo ke gelo do çi qerar bêro dayene.
DEM Partî zî vizêr qerarê DMME’yî ra pey eşkerayî daye û waşt ke Demîrtaş, Fîgen Yuksekdag û heme girewteyê Dewaya Kobanî bilez veradîyê.
Serekê Pêroyî yê MHP’yî Devlet Bahçelî zî ewro kombîyayîşê hewtane yê partîya xo ra pey cewab da persanê rojnamegeran û vat: “Veradayîşê Selahattîn Demîrtaşî do seba Tirkîya bibo wesîleyê xeyrê.”
