Ayhan Çatakçi 30 serrî ra dima cayo ke tede weşîya xo ramitêne ci ra erzîya teber. No ca verî Mektebê dewa Şovayîge bî. Rijîyaye bî, Çatakçi tamîr kerd û tede mendêne. No zimistan dewlete eşt teber. Wina vano: Mektep rijîyabî mi viraşt, nika ez bîlaseve eşta teber.”
Mektebê dewa Şovayîge ya ke girêdayeyê Dêrsimî ya rijîyayebî û amebî teriknayene. Ayhan Çatakçi 30 serre nayera ver newe ra tamîr kerd, dormeyê ey pak kerd, darî nayî ro. 1997î ra nat keyeyê Ayhan Çatakçi tede nuşeno ro û heybanan keno veye. Her serre bostan nêne ro û debareyê xo dîyêne. No zimistan dewlete cira vetî. Ayhan Çatakci wina vano: Mektep rijîyabî mi viraşt, nika ez bîlaseve eşta teber.”
‘Halê mi zaf rind nîyo’
Ayhan Çatakçi rewşa ke tedero vazeno ke bêro zanitene û ma ra wina vano: “Mektebê dewa ma 1997î de bî tal, 30 serre ma tede mendîme. Hukmatî ma ra va ke ‘tede bimane.’ Dewijan gerê ma kerd, hukmatî kî ame ma eştîme tever. Mi ra va ke ‘to îta îşxal kerd o.’ Mi kî vake ‘sima mi ra va bimane, nika kî vanê tever be.’ Çîyê mi girewt eşt tever, qatixe mi verdîya de, çîke est o ververa şîlîye de mend o. Qarîyane, verê înû de her çîyê xo veşnay. Mi re hevîke qûlîk dî, nika vanê tever be. Naxirê mi tever de mend.
Mi 30 serrî qaytê nê mektebî kerd. Dormeyê ey kerd pak, kotî ke rijîyo viraşt, gozî nayî ro, tûye û saye nê ro, bîyane heşîr, kesê ke tever de amêne di hîrê qurîşî dêne mi, mi pê ey çîyo ke kemîyo viraştêne. Cayê çin o ke awe xo ro bikerî. Bonê mî çin o. Tever de mendane. Naxirê mî, bizê mî tever de mendê.”
‘Cayê mî çin o ke tede bimanî’
Ayhan Çatakçî, qiseykerdîşe xo yê peyênî de sarê xo ra poştî vazeno û wina vano: “No zulm o mi dîyo, çutur ke evladê resûlî Kerbela de kişt, pîlê ma 38î de ameyî kiştene, ameyî dardekerdene, na ke mi dîya, hêşîrîya mi kî înû ra kemî nîya. Sarê ma, mi rê poşt bîdêro, neçarane, bekesane, tengîya mi bîvînê.”
