Verfeka DEM Partî Ayşegul Dogan vat ke hêrîşê Helebî hetê grûban ra ke Tirkîya piştî dana, yenê kerdene û îfade kerd ke ganî Tirkîya Sûrîye de rolêko awanker bigîra xo ser ke teşwîqê dîyalogî bikera.
Vervfeka Partîya Têduştî û Demokrasî ya Şaran (DEM Partî) Ayşegul Dogan, kombîyayîşê Komîteyê Rayberdişî yê Merkezî (MYK) ya vîzêrênî de û averşîyayîşê rojevî ser o merkezê pêroyî yê partî de kombîyayîşê çapemenîye organîze kerd.
Ayşegul Dogan ke Prosesê Aştî û Komelê Demokratîkî ser o qisey kerd, vat ke proses bi lezîya ke hewce keno, aver nêşono: “Cehd keno ke aver şêro, şono zî la hema bes nîyo.” Dogan dîyar kerd ke proses firsendêko tarîxî yo, nêbîyayîşê gamanê şênbêran endîşeyê komelî zêdeyêr keno.
Hîşyarîya ziwanê tehdîtî
Ayşegul Dogan îfade kerd ke ganî proses bi gamanê qanûnî û fîîlîyan xurt bibo. Dogan qerarê AÎHM’î yê binpaykerdişî derheqê Hemserekanê verênan ê HDP’yî Fîgen Yuksekdagî û Selahattîn Demîrtaşî de ardî vîrî û vat ke ganî nê qerarî bilez bêrê caardene.
Dogan bale ante ziwanê tehdîtî ser o ke sîyasetmedarê AKP û MHP’yî şuxulnenê û vat: “Ziwano tûj zaf çî Tirkîya rê da vindîkerdene. Êdî ganî herinda nê ziwanî de, ziwanê dîyalogî bêro tercîhkerdene.”
‘Êdî ganî serûberkerdişê qanûnî bêrê kerdene’
Dogan bale ante komîsyonî ser o ke xebatanê xo Meclîsî de domneno û vat ke ganî bilez bingeyê yewîya komelkî û hemwelatîya têduştî de serûberkerdişê qanûnîyî bêrê caardene. Aye îfade kerd ke seba caverdayîşê çekan û akerdişê vernîya sîyasetê demokratîkî temambîyayîşê çarçewaya qanûnî mecburî yo.
Taxê Helebî binê ambargo de yê
Ayşegul Dogan bale ante hêrîşanê hukmatê demkî yê Şamî yê vera kurdan ser o û vat ke Heleb de taxê Şêxmeqsûd, Eşrefîye û Benî Zêdî bi çekanê giranan yenê hedefgirewtene. Dogan vat: “Taxê ke tede 200 hezar însanî ciwîyenê bi tank, top, obûs û dronan binê ambargo de yê.”
Ayşegul Dogan vat ke raya pêroyî de ame vilakerdene ke hêrîşan de grûbê Hemzat, Emşat, Sultan Murad û Nureddîn Zenkî ke zanîyeno ke Tirkîya piştî dana înan, ca gênê. Dogan îfade kerd ke ganî Tirkîya Sûrîye de rolêko awanker, yewkerdox û teşwîqkerdoxê dîyalogî bigîro xo ser û vat: “Tirkîya ganî qet rolêko parçekerdox kay nêkera.”
Dogan îfade kerd ke Peymana 10ê Adare belgeyê Sûrîyeya demokratîke, zafpereste û seypêyî ya û vat ke Sûrîye tena yew nasnameyo nîya yew bawerî ya zî. Aye dîyar kerd ke ganî kurd, ereb, xiristîyan, durzî, elewî û heme şarê bînî sey hemwelatîyanê seypêyan pîya biciwîyê.
Ayşegul Dogan ard vîrî ke înan verê zî raya pêroyî reyde pare kerdo ke Rayberê Şarê Kurdî Abdullah Ocalan wazeno Mesud Barzanî, Neçîrvan Barzanî û Mezlum Ebdî reyde rasterast têkilî rono. Dogan vat ke averşîyayîşê herême Tirkîya ser o zî rasterast tesîr kenê û vat ke ganî vernî bêro akerdene ke Rayberê Şarê Kurdî Abdullah Ocalan rasterast têkilî rono û wina vat: “Beranê Îmralîyî akerê wa şer vindero.”
Dogan vat ke waştişê Heyetê Îmralî est o ke Serokkomar Tayîp Erdogan û Rayberê Şarê Kurdî Abdullah Ocalanî reyde bêrê têhet la derheqê nê pêvînayîşan de hema teqwîmêko zelal çin o.
