Ewro serrgêra 8. ya îşxalê bajarê Efrînî yo ke 18ê adare 2018î de hetê dewleta tirke ya îşxalkere û çeteyanê ci ra ameyo kerdene.
Herêma Efrînî ke tarîx de sey “Çîyayê Kurmênc” yena naskerdene Rojawanê Kurdîstanî de ya. Îşxalî ra ver se ra 98ê şarê ci kurdî bî. La badê 8 serranê îşxalî rêje kewt binê se ra 25î û 300 ra heta 350 hezar şarê kurdî bi zorî ameyê koçberkerdene.
Sûcê dewranê hêrişan de
Aktîvîstê heqê merdimîye Îbrahîm Şêxoyî vat ke hêrişanê îşxalî de 600 kesî ameyê kiştene ke 95 gedeyî û 100 ra vêşêr cinîyî mîyanê înan de yê. 72 bîyayîşê destdergîya cinsîyetî ameyê qeydkerdene.
Vurnayîşê nasnameyî
Şêxo vat ke nasnameya bajarî bi temamî vurîya, nasnameyê tirkî ferz bîyo, 59 cayê arkeolojîkî ameyê rijnayene, 28 goristanê dînî yê misilmanan û êzîdîyan ameyê rijnayene û talankerdene. Nameyê kuçe û meydanan bi nameyê tirkî vurîyayê û kurdkî perwerde û îdare de qedexe bîyo.
Rijîyayîşo xozayî
Mîlyonêk ra vêşêr darê zeytûnî ameyê birnayene, 50 hêzar ra vêşêr ameyê veşnayene û 100 hêzar ra vêşêr darî wekîyayî û berdê Tirkîya de ameyê rotene.
Şêxoyî vat ke 47 wargehî Efrîn de virazîyayî û erebê Derazor, Helebce, Îdlîb û cayê bînan ra ameyê bicakerdene. Hûmara destbendkerdeyan 10 hêzaran ra vîyarte ke zafê ci dima azad bî la qederê nêzdîyê 2 hêzar kesan hîna dîyar nîyo.
Badê peymana 29ê çeleyê 2026î hêvîyê koçberan ê agerîyayîşî newe ra gandar bî. 10ê adare de karwanêkê 400 keyeyan resa Efrîn. Goreyê melumatan ke Meclîsê Koçberanê Efrîn û Şehba ra ame girewtene 12 hêzar keyeyanê koçberî heme paweyê agêrayayîşê Efrînî yê.
Şêxoyî vat ke rêjeya kurdan nika Efrîn de se ra 77 ra vêşêr a û hêvîya xo wian vat: “Agêrayîşê şarî bajar û herra xo, herra baw û kalan, gamêka muhîme û serkewtişêko tarîxî yo. O nasnameyê Efrînî agêreno û darê zeytûnî ke sembolê haştîye yê, gandar benê.”
