Efrînijê ke vizêrî agêrayê, bi beşdarî û hetkarîya Asayîşê Rojavayê Kurdîstanî bi hewayêko ewle qezayanê Cindirês û Şiyê de ameyê bicakerdene. Fermandaranê Hêzanê Ewleyî ra Mehmûd Xelîlî vat ke nika seba pêşwazîkerdişê grûbêka esîraan ke yenê veradayene, vîyarenê Hesekê.
Fermandaranê Hêzanê Ewleyî ra Mehmûd Xelîlî hesabê xo yê X’î ser o nuşteyêk derheqê agêrayîşê Efrînijan de pare kerd û dîyar kerd ke çarçewaya bicaardişê peymana 29ê çele de Fermandarîya Hêzanê Ewleyî ya Zereyî (Asayîş) resayo şaristanê Efrînî ke qonaxo yewin ê agêrayîşê koçberan herêmanê xo de temam bikê.
Efrînijê ke vizêr çarçewaya Peymana 29ê çele de agêrayê erdê xo ser, bi beşdarîya Asayîşê Rojavayê Kurdîstanî bi hewayêko ewle keyeyanê înan ê qeza û dewanê Cindirês û Şiyê de ameyê bicakerdene. Cagirê Fermandarê Ewleyîya Zereyî yê Hesekê Mehmûd Xelîlî derheqê agêrayîşê Efrînijan de qisey kerd û wina vat: “Encamê pêvînayîş û xebatanê seba agêrayîşê koçberan de ameyê kerdene, ewro grûba yewine resaye Efrîn. Seba agêrayîşêko ewle Fermandarîya Hêzanê Ewleyî zî koçberan reyde resa Efrîn. Ma seba ke Efrînijî bi hewayêko ewle agêrê mal û erdê xo ser bingeyo musaîd amade kenê.”
Bi hewawayêko ewle ameyê bicakerdene
Xelîlî vat ke grûba yewine bi hewayêko bêproblem resaya Efrîn û qezayanê Cindirês, Şîyê û qezayanê ke girêdayeyê nê cayan ê, uca de ameyê bicakerdene. Xelîlî îfade kerd ke demê bicakerdişê welatijan de tu problem nêvejîyayo û mîyanê atmosferêko ewle de keyeyî resayê erdê xo ser.
Seba kesanê ke vîndî bîyê, xebate dewam kena
Mehmûd Xelîlî vat ke seba domnayîşê hetkarîya merdimî ya seba keyeyanê ke agêrayê zî xebatî dewam kenê. Xelîlî vat ke xebatê înan ê seba dosyaya kesanê ke esîr ameyê girewtene û vîndîkerdeyan zî bilez xebatanê xo kenê û wina vat: “Nika ma do şêrê Hesekê û pêşwazîya grûbêka kesan bikerê ke esîr ameyê girewtene.” Xelîlî îfade kerd ke seba caardişê Peymana 29ê çeleyî xebatanê xo here hetî ra domnenê.
