Nuştox Şahabettîn Demîrî dîyar kerd ke rexneyê Rayberê Şarê Kurdî Abdullah Ocalanî yê serê ziwanê kurdkî xeylê tesîr serê ey de kerdo û vat: “Badê rexneyê Serekî mi vat ewro ra tepîya ez o bi kurdkî binusnî. Ganî ma bi kurdkî binusnê û biciwîyê.”
Nuştox Şahabettîn Demîrî kitabê bi nameyê “Dogaya Donus”, “Yuregimizin Aci Çigligi”, “Guluşunde kaldim”, “Mavi Sevgi”, “Moria Kampi: Karanlik Fisiltilar, Hakîkate Kavuşma Vakti” bi ziwanê tirkî nuştê. Nuştox kitabê bi nameyê “Dogaya Donus”, Yuregimizin Aci Çigligi” serê qetlîamê Gelîyê Zîlanî nuştê.
Badê rexneyanê Rayberê Şarê Kurdî Abdullah Ocalanî yê ke vatbî şarê kurdî bi ziwanê xo nênuseno û qisey nêkeno ser nuştox Şahabettîn Demîrî verê xo da nusîyayîşê kurdkî. Kitabo verên o bi kurmancî yê nuştoxî bi nameyê “Sterka Bakur” vejîya. Kitab de behsê gerîlaya bi nameyê Bêrîvane, hîs û hişmendîya zerrîya aye yê serê pêroyê komelî de tewrê têgêrayîşî bîya û dima ra şehîd bîya yeno kerdene.
Nuştox Şahabettîn Demîr derheqê kitabê xo û wayîrvejîyayîşê ziwanê kurdkî de qisey kerd.
‘Ez sey şorişgêr xizmetê şarê xo de ya’
Şahabettîn Demîr dîyar kerd ke kitabê ey yê yewin serê psîkolojîya komelî bî û vat: “Wexto ke mi rojnamegerî kerdêne mi dest bi nuştiş kerd. Sebebê nustişê mi o yewin no bî; komelo ke ez tede ciwîyena serê nê komelî de mîsyonê ma est o. Nê mîsyonî bi da nusîyene. Ez sey şorişgêr xizmeta şarê xo de ya. Nameyê kitabê mi ê yewine “Dogaya Donus” bî. Problemê modernîteya kapîtalîst ê serê xoza de bî. Kitabê mi no bîn zî serê komelî de bî, psîkolojîya komelî, vîrardena gerîla û keyeyê înan bî.”
‘Stêrka Bakur serê edebîyatê psîkolojî de ameyo nuştene’
Asîmîlasyonî ser zî Şahabettîn Demîr ard ziwan ke mîyanê komelî de çiqas şino asîmîlasyon zêde beno û wina vat: “Çiqas şino kurdkî yeno vîndîkerdene. Sey nuştoxêke kurd mi rê zaf rexne ameyene. Sey rexnedayena zî mi dest bi nuştişê kitabê ‘Stêrka Bakur’ kerd. Na dora serrêke ya ke ez serê nê kitabî de xebitîyena. No kitab hîsê cuye û şorişî yo, kesê ke mîyanê şorişî de şehîd bîyê, înan ser o ameyo nuştene. Kitabê ‘Stêrka Bakur’ serê edebîyatê psîkolojî de ameyo nusîyene. Derheqê edebîyatê psîkolojî de kitabê kurdkî kêmîyê.”
‘Ganî ma bi kurdkî binusnê û biciwîyê’
Şahabettîn Demîr vîr vist ke rexneyê Rayberê Şarê Kurdî Abdullah Ocalan ê serê ziwanê kurdkî ey ser xeylê tesîr kerdo û wina dewam kerd: “Badê rexneyanê Serekî mi vat ewro ra pey ez o bi kurdkî binusnî. Xora no mîsyonêko, serê sazgeh û komelî de seba nêqiseykerdişê kurdkî rexneyî yenê kerdene. Ewro statuya kurdkî çin a. Ziwanê kurdkî hema zî sîstemî hetê qedexe yo. Ma do zî têkoşînê ziwanê xo dewam bikerê. Statuya Rayberê Şarê Kurdî û ziwanê kurdkî mîyanê sîstemî de bêro normalîze kerdene. Ma her ca de statuya ziwanê kurdkî wazenê. Ganî ma bi kurdkî binusnê û biciwîyê, bi waştiş tu kes çîyêk nêdano ma. Ganî ma her ca de bi hêz bê. Eke xebat bibo do statu zî bibo.”
