Hemserekê Pêroyî yê DEM Partî Tuncer Bakirhan dîyar kerd ke Birêz Ocalan mesajê: “Kapîtalîzm hêvîya ma dizeno” dayo û wina va: “Girdkerdişê hêvî, çareserî û aştîye, deynê milê ma yo.”
Bi pêşengîya DÎSK, TMMOB, Odeya Tabîban a Amedî, Meydanê Îstasyonî de mîtîngê 1ê Gulane ame viraştiş. Mîtîngê 1ê Gulane yê Amedî, bi sloganî “Ma seba azadîya kede û komelo demokratîkî 1ê Gulane de meydanan de yê” dest pêkerd. Welatij û kedkarî bi coş û heycanî 1ê Gulane pîroz kerd.
Mîtîng de Hemserekê Pêroyî yê DEM Partî Tuncer Bakirhan qise kerd.
Tuncer Bakirhan va ke kedkaran bi eraqê xo yê çareyî û keda xo hetkarîdayîşî gird kerdê û wina domna: “Şima ziwan û nasnameyê kurdan pawit, şima komelî ra xizmet kerd. Ma do welatêko azade awan bikerê. Nika no welat de krîzêko gird est o, faturayê nê krîzî zî kedkar, karker û xebatkar danê. Birêz Ocalan 27ê Sibate de vengdayîşê Aştî û Komelê Demokratîkî kerd, waşt ke bi nê vengdayîşê heq, huquq û keda kedkaran bipawo. Eke ma heme no vengdayîşî ra wayîr bivejî do rojanê weş benda ma bibê.”
Ma ganî aştî gird bikê
Tuncer Bakirhan destnîşan kerd ke ganî ma verba nê pergalî de yew bibê û wina qedîna: “Ma Girawa Îmraliyî de 4 saet mendê, uca de tena problemê kurdî ser o nêame qisekerdiş. Heqê karker, kedkar, cinî û ciwanî ser o zî ame qisekerdiş. Birêz Ocalan bi aşkera wina va; ‘Kapîtalîzm hêvîya ma dizeno.’ No ser ganî ma aştî gird bikerê.”
Dima zî hunermend Helîm Omerî, bi deyranê xo beşdaran coş kerd.
