Hemserekê Pêroyî yê DEM Partî Tuncer Bakirhanî kombîyayîşê partîya xo de, bê ke nameyêk bido, cewab da qiseyanê Devlet Bahçelî yê ke vatibî “Kurd nêşenê bikewê nê şerî” û vat: “Wa nê qiseyan ra fek veradê. Kurdî zanê kamca de se bikerê. Wa kes aqil nêdo Kurdan.”
Bakirhanî bale ante ke Rojhelatê Mîyanên de kewtê krîzanê hîna xorînan û derheqê şerê Îranî de vat: “Rejîmê Îranî tu wext hêzê xo nêdano şaran. Heme çimeyê Îranî seba tank û topan ameyê abirnayene. Vera nasnameyê şaran zî tu azadî temîn nêkerd. La bi mudaxeleya teberî azadî û demokrasî nêyeno nê welatî. Şarê nê welatî eşkenê azadî û demokrasî bîyarê. Ganî şer û pêkewtişî biqedê û rayberîyê ke şaran ser o teda kenê zî ganî bibedilîyê.”
‘Çira hertim dinya qala kurdan kena?’
Bakirhanî cewab da Bahçelî û vat: “Hewteyêk herkesî behsê kurdan kerd. Verê nê zî seba Rojava reyna qal ameybî kerdene. Çira hertim dinya qala kurdan kena? Wa dewletê herêmî na babetê ser o bifikirê. Eke kurdî mîyanê dewletanê ke tede ciwîyenê wetatbîyayîşê azad û seypê nêbibê, behsê kurdan nêyeno kerdene. Ziwan, kultur û heqanê kurdan nas bikerê û wa wexto ke guleyêk biteqîyo dinya qala kurdan nêkero.”
Birêz Ocalan gelekî reyan seba Îranî hişyarî da
Bakirhanî dîyar kerd ke serkêşî û pêşenganê kurdan çareserî gêrenê û vat: “Birêz Ocalan gelekî reyan seba Îranî hişyarî da. Vat ‘mebê şirîkê şerî la wexto ke şima çin hesibnayê zî bibê yew û xo bipawê.’ Birêz Mesûd Barzanî, Neçîrvan Barzanî û Bafil Talabanî zî eynê çî vat. Heme vanê kurd nêbenê mertalê kesî û seba heq û azadîya xo têkoşîn danê. Ê ke vanê ma têgêrayîşanê kurdan taqîb kenê, wa verê ci serkêşî û pêşenganê kurdan yê bi rûmet bivînê û bişopnê.”
‘Heqanê heme şaran temîn bikerê’
Bakirhanî hêrişê rejîmê Îranî yê vera Başûrê Kurdîstanî şermezar kerd û vat: “Mîyanê şerî de yo la hetêk ra zî hîna hêrişê kurdan keno. Verê hêrişkerdişê kurdan wa heq û estbîyayîşê kurdan nas bikero. Bêrê Rojhelatê Mîyanênî demokratîk bikerê û heqanê heme şaran temîn bikerê.”
‘Nika ma pirdê sîratî ser o yê’
Bakirhanî vat ke Tirkîya ganî vera xetereyê şerî prosesê Aştî û Komelê Demokratîkî de gamanê hîna şênberan bierzo û vat: “Nika ma pirdê sîratî ser o yê. Luksê ma çîn o ke gamî hêdî bêrê eştene. Wextê ma nêmendo. Ganî bilez gamî bêrê eştene. La îqtîdar hîna hesabanê şenikan keno. Nê prosesî de tewr muhîm huqûq û demokrasî yê. Hetêk ra vanê wa Ehmed şêro karê xo, hetê bînî ra zî wextê qeyûman derg kenê. Êdî wa no biqedîyo û wa hemşaredarî agêrê karê xo. Qerarê MHME’yî bîyarê ca ke Demîrtaş û Yuksekdag bieşkê beşdarê Newroze bibê.”
Bakirhanî venga cinîyan, ciwanan û heme şaran da ke Newroze de beşdarê Newroze bibê ê û vat: “Bêrê ma pîya vengê aştîye berz bikerê û no serdemo tarîxî de beşdarîyêka tarîxîye ya xurt bibo.”
