Endama Heyetê Îmralîyî ya DEM Partî Pervîn Buldan dimayê pêvînayîşê Wezîrê Edaletî Akin Gurlek reyde îfade kerd ke yeno pawitene ke dimayê roşanî, pêvînayîşê qanûnan do komîsyonê edaletî de dest pêbikerê û Mîthat Sancarî zî dîyar kerd ke amancê prosesî aştî yo û temînatê aştî zî edalet o.
Heyetê Îmralîyî yê DEM Partî ke parlamenter Pervîn Buldan û Mîthat Sancarî ra yeno pê, dimayê pêvînayîşan Wezîrê Karanê Zereyî Mustafa Çîftçî û Wezîrê Edaletî Akin Gurlekî reyde vernîya awanîya Wezaretê Edaletî de derheqê pêvînayîşan de eşkerayî daye.
‘Pawitişê kerdişê qeyûmî û qerarê mehkemayan est o’
Pervîn Buldan dîyar kerd ke înan 2 pêvînayîşê muhîmî kerdê û wina vat: “Wezîrê Edaletî serdemêko ke qerarê Mehkemaya Heqanê Merdiman a Ewropa (MHME) nêameyêne ca, wezîfe girewt. Şar caardişê huqûqî Wezîrê Edaletî ra paweno. Sewbîna şar rîyê kerdişê qeyûmî ra paweyê Wezîrê Karanê Zereyî yo. Ma her di meseleyê zî wezaretan reyde pare kerdê û fikir û ewnîyayîşê înan girewtê. Pêvînayîşêko zaf pozîtîf bi.”
‘Temînatê aştî edalet o’
Mîthat Sancarî zî îfade kerd ke înan prosesî ser o, huqûq û demokrasî ser o pêvînayîş kerdo û nê çîyî vatê: “Çîyê ke şar paweno ma wezîrî reyde pare kerdê. Amancê prosesî aştî yo û temînatê aştî zî edalet o. Seba aştîyêka domdare lazimtî bi edaletêk est a ke seba heme merdimab vîyartbar a. Wezîrê Edaletî seba vetişê qanûnan rolêko muhîm kay keno. Ma ney zî Wezîrê Edaletî ra vat. Sewbîna Wezîrê Karanê Zereyî zî seba prosesî muhîm o. Ma xebatanê înan ser o agahî girewtê û pêşnîyazê xo îfade kerdê.”
‘Ganî kerdişê qeyûmî biqedîyo’
Mîthat Sancar derheqê persê qeyûman ser o ameyo kerdene zî îfade kerd ke kerdişê qeyûman vera qanûnê bingeyînî yo û dergkerdişê kerdişan nê binpaykerdişî vêşî keno û vat ke hêvîya înan a ya kerdişê qeyûman biqedîyê.
Pervîn Buldan zî persê amadekerdişê demê qanûnan da zanayene ke yeno pawitene ke qanûnî dimayê roşanî şêrê komîsyonê edaletî yê wezaretî. Pervîn Buldan vat ke îhtîmalêko pîl do dimayê roşanî komîsyonê edaletî de pêvînayîşê qanûnan dest pêbikero.
