Wezîrê Karanê Teberî yê Fransa Jean-Noel Barrotî da zanayene ke seba ke hêrişê Helebî bêrê vindarnayene, Fransa asta tewr berze de xebitîyena.
Parlamenterê Koma Fransaya ke Ser Nêwarana (LFI) Arnaud Saint-Martinî, Parlamentoyê Fransa de raşteraşt persê derheqê hêrişanê Helebî de Wezîrê Karanê Teberî yê Fransa Jean-Noel Barrotî rê kerd. Parlamenter Arnaud Saint-Martinî bal ant hêrişanê ke 6ê Çeleyê 2026î de dest pêkerdê ser o û wina vat: “Hedefê nê hêrişan o yo ke kurdan taxanê Helebî ra teber bikerê û sîstemê demokratîk ê herême orte ra wedarnê.”
‘Hemkarîya Şam û Tirkîya herême tehdît kena’
Arnaud Saint-Martinî dîyar kerd ke herême de sûcê giranî yenê kerdene û Îdareyê Şamî zî bi paştîdayîşê leşkerî yê Tirkîya herême tehdît keno. Saint-Martinî îfade kerd ke na “bêvengîya komelê mîyanneteweyî ya” û nêbeno ke “ma nêvînayîşî ra bêrê”.
‘Wa Fransa garantorîye bikera’
Parlamenter Arnaud Saint-Martinî dîyar kerd ke seba pawitişê kurdan, lazimî bi hêzêko lezgîn est o. Saint-Martinî Fransa ra waşt ke seba ke adirbestêko lezûbez bêro kerdene û seba ke muzakereyî dest pêbikerê, wa muracatê Neteweyanê Yewbîyayeyan (NY) bikero ke Konseya Ewleyî kom biba.
Saint-Martinî waşt ke wa xebatî bêrê kerdene ke taxî ke binê dorpêçî de yê, çimdarîya mîyanneteweyî û rojnamegeran de bêrê akerdene û seba pêameyîşêko domdar û çareserîyêka sîyasî Fransa biba garantor.
Hetê Amerîka de mabênkarîye kenê
Wezîrê Karanê Teberî yê Fransa Jean-Noel Barrotî cewab da persanê Arnaud Saint-Martinî. Jean-Noel Barrotî da zanayene ke se merdimî ra zêdeyêr ameyê kiştene û hûmarêka zaf zî birîndar bîyê. Barrotî dîyar kerd ke seba ke şerê mabênê Şam û HSD’yî vindero, Fransa hetê Amerîka de mabênkarîye kerda û seba ke netîce vejîya orte, bi helwestêko aktîf kar kerdo.
Macronî raşteraşt beşdarîya xebata mabênkarîye kerda
Jean-Noel Barrotî dîyar kerd ke Serekkomarê Fransa Emmanuel Macronî seba ke şer vindero mesaj erşawito û raşteraşt mudaxîlê pêardişê aştî bîyo. Wezîr Jean-Noel Barrotî bal ant çinbîyayîşê rejîmê Beşar Esadî ser o û wina domna: “Fransa dima ke no çinbîyayîş ame meydan, bi xebata xo şekil dayo rewşa Sûrîye.”
‘Kurdî mutefîkê ma yê’
Jean-Noel Barrotî vat ke îstîkrarê Sûrîye entegrasyonê kurdan reyde girêdaye yo û wina va: “Kurdan vera DAIŞ’o ke xeylê reyan gonîya fransijan rişnaya, ey reyde şer kerd û o çin kerd. Naye ser o zî kurdî mutefîkê ma yê.”
‘Ma waşt ke heqê hêzanê kurdan ê leşkerî bêrê qebulkerdene’
Jean-Noel Barrotî dîyar ke seba ke Wezîrê Karanê Teberî yê Sûrîye tawîzan bido, Parîs de ame qebulkerdene û wina domna: “Tîyta de çîyo ke ame waştene no bi; tayê heqê hêzanê kurdan bêrê qebulkerdene û entegrasyonê înan hêzanê Şamî reyde bêro ca.”
Noel Barrotî dîyar kerd ke ê bi nê xebatan paştî danê kurdan.
