Di çarçoveya planê vurnayîşê materyalanê wendegehanê verên, mîyanên û amadeyî de, qonaxê diyîne qedîya. Qonaxê hîrêyîne zî dest pê kerdo.
Sazîya Materyalan (Minhacan) a Bakur û Rojhelatê Sûrîye, gorê planê vurnayîşê materyalanê wendegehan yê ke serra 2024î de dayî destpêkerdiş, qonaxê diyîne yê vurnayîşê materyalan qedîna. Di qonaxê diyîne de materyalê refanê 2, 5, 8 û 11î, yê ke serra wendene ya 2025-2026 de wendegehan de yenî vilakerdiş, newe ra ameyî virastiş.
Di qonaxê diyîne de materyalê dersanê ziwanê Kurdkî, Erebkî, Îngîlîzkî, fîzîk, kîmya, bîyolojî, bîrkarî, felsefe, dîrok, wênesazî, çand û exlaq, civatnasî, zanîstê civakî, erdnîgarî, civak û heyat, muzîk û werzîş ameyî newekerdiş.
KURDKÎ
Mijarî gorê pîvananê ke gereke wendekar hîna baş goş bidî vînayanê derûdorî, dîrok û erdnîgarîya welatê xo nas bike, çandê xo rê girê bîyo û qîymetê cemaatî bipawê ameyî ronayîş.
EREBKÎ
Di kitaban de mijar, nuşte û helbestî ameyî vurnayîş. Persî zî serê esasê musayîşê dûrê ezberî ameyî dayîş û sey cigêrayîş û hemkarî ameyî cayîş. Gorê netîceyê rapirsînî (yê ke verê vurnayîşî ra mamosta û wendekaran ra ameyo kerdiş), di kitaban de dersî zêde nêbîyî.
ÎNGÎLÎZKÎ
Di dersa ziwanê Îngîlîzkî de ke refa 4îne ra wendekarî musenî, gorê agahîyanê ke elaqedarê cemaat, çand û dîrokê Herêma Bakur û Rojhelatê Sûrîye yî ameyo dîzaynkerdiş.
CÎVAT Û CU, ZANÎSTÊ CÎVATÎ Û CÎVATNASÎ
Mijarî nêameyî vurnayîş, labelê şikilê kitaban de vurnayîşî ameyî kerdiş. Seba ke wendekarî hîna zaf hîs û şexsîyetê xo nas bikerî, hûneranê xo aver berî û elaqeyê xo yê derûdorî dir hîna baş virazî, dersî est î.
FÎZÎK, KÎMYA Û BÎYOLOJÎ
Dersî dûrê ezberî ameyî ronayîş. Hîna zaf warê mîsaldan de ke mamosta û wendekarî pîya çareser kenî ameyo kerdiş. Agahî di kitaban de zêde bîyî û girêdayîşê înan bîrkarî, kîmya û bîyolojî dir ameyo kerdiş.
KULTUR Û EXLAQ
Rayîrê dayîşê dersan heme ameyî vurnayîş, metodê munaqeşe, analîz û cigêrayîşî ameyo esasgirewtiş. Her peynîya her yew beşî de projeyê cigêrayîşî estî ke gereke wendekarî înan virazî.
FELSEFE
Warê dayîşê dersan de vurnayîş ame kerdiş. Seba ke wendekarî serê o çi ke înan rê yeno dayîş bifikirî û afirnayîşê xo bivînî, dersî bi metodê newe yê ke xo paweno munaqeşe, dayîşûgirewtiş û cigêrayîşî, ameyî dayîş. Agahî bi hawayêkê sîstematîk ameyî ronayîş.
TARÎX
Dersa dîrokî de agahî tena di çarçoveya Rojhelatê Mîyanênî de nêameyî dayîş. Seba ke tecrubeyê cîhanî wendekaran dir ameyî parekerdiş û hîna zaf bîyayîşê derûdorî rê, nasnayîşê tecrubeyanê ke elaqedarê merdimayîye yî, gelek cayan de cîhan de ameyo kerdiş. Kitab serê bingeyê ke dîrok zanîstêka gerdûnî ya û tena di yew erdnîgarîye de sînordar nêmîneno ameyo dîzaynkerdiş.
COGRAFYA
Di warê dersdayîşî de metod ame vurnayîş. Hîna zaf nêzî warê munaqeşe û cigêrayîşî ameyo kerdiş. Agahî bi hawayêkê ke tam û nê yeno famkerdiş nêameyî dayîş. Seba ke wendekarî hîna baş fam bikerî, agahî bi şêwazêkê hîna baş ameyî cayîş.
VÎRKARÎ
Di dersa vîrkarî de hûmara dersan ameyî zêdekerdiş. Mîsaldanê ke seba wendekaran yenî dayîş ke çareser bikerî, girêdayîşê înan dersanê erdnîgarî, dîrok û ûsn. dir ame kerdiş. Seba ke wendekarî mîyanê wendekarîya unîversîte de vindî nêbîyî, hîna dersanê neweyî ameyî zêdekerdiş, sey (Linear Programming) yê ke wendekarî hîna zaf eşkenî encamanê başan mîsaldan ra vejî.
MUZÎK
Kitabî de tena kilamî tenîk ameyî ronayîş. Hîna zaf teorîyê muzîkî înan rê ameyî zêdekerdiş. Seba ke wendekarî kotî de bê û çi amûrî bivînî, eşkenî înan bidî, nuştişê noteyanê muzîkî zî di kitaban de yeno musnayîş. Seba înan zî raybernameyê mamostayan ame virastiş.
WERZÎŞ
Beşa werzîşî de sey ke ma agahî di rapora xo ya verêne de zî dayî, kitab çin o. Labelê heta nika refanê 1-9î rê rêbernameyê mamostayan ame hazirkerdiş.
RESÎMSAZÎ
O gorê temenê wendekaran ame dayîş. Hunerkarê Sûrîye û cîhanî di kitabî de ameyî nasnayîş û berhemê înan zî ameyî cayîş. Seba ke çandê wendekaran yê hunerî aver şiro, behreyê rengkerdişî, gewdekerdişî, karê destî, çêjtişê hunerî, çandê hunerî û agahîyê hunerî di kitabî de ameyî zêdekerdiş. Her wina kehenşanê herême, qelayî, mîrasan û peykeranê Sûrîye yê warê hunerî de ameyî pênasekerdiş.
PERWERDEYÊ OL Û BAWERÎYAN
Kitabanê ola Îslamî û Êzidî serra 2022 û 2023 de ameyî hazirkerdiş, serra 2024 de derbazê wendegehan bîyî. Perwerdeyîşê olî refa 4îne ra wendekaran rê yeno dayîş.
MATERYALÎ YENÎ ÇAPKERDIŞ
Endamê Sazîya Materyalan Umran Yûsif va ke materyalê ke ameyî vurnayîş seba çape ameyî şawitiş. Kitabî do seba serra wendene ya 2025-2026 bênî vilakerdiş.
QONAXÊ HÎRÊYÎNE DEST PÊ KERD
Gorê agahîyanê ke Umran Yûsif dayî, xebatê qonaxê hîrêyîne yê vurnayîşê materyalan zî dest pê kerdî. Di na qonaxî de kitabê refanê 3, 6, 9 û 12î newe ra yenî virastiş. Yeno plan kerdiş ke seba serra wendene ya 2026-2027 wendegehan de bênî vilakerdiş.
Qonaxê yewîne de materyalê refanê 1, 4, 7 û 10î ameyî vurnayîş. Di serra wendene ya 2024-2025 de dest bi şuxulnayîşê înan ame kerdiş.
