Seba ke namzetê PDK’yî yê Behdînanî weçînitişî de sernêkewto, terefgirê ci vejîyayê kuçe û encamî protesto kerdê.
Encamê destpêkî yê weçinitişê parlamentoyê Îraqî ameyê eşkerakerdene. Dima dîyar bi ke namzetê PDK’yî yê Behdînanî weçînitişî de sernêkewto, terefgirê ci vejîyayê kuçe û encamî protesto kerdê.
Nêzdîyê şaristanokê Berdereşî, Sêriyana Amyanî de xeylê terefgirê PDK’yî rayîrê Dihok û Hewlêrî girewtê. Welatijê ke vera PDK’yî sloganan vanê, dîyar kenê ke problemê herêma înan hetê PDK’yî ra nêyenê çareserkerdene, PDK’yî îxanetê namzet û venganê înan kerdo.
Eynê wextî de endamê eşîra Silêvanîyan rayîrê Dihok-Zaxo de, endamê eşîra Musireşîyan rayîrê berê sînor ê Zaxo-Îbrahîm Xelîl û endamê eşîra Goran zî rayîrê Berdereş-Dihok û Hewlêrî girewtê. Welatijê ke rayîran ser o lastîkan veşnenê, nerazîbîyayîşê xo domnenê.
Hedîse ra pey, hêzanê PDK’yî bi gazo ke çiman veşneno, mudaxeleyê çalakîkeran kerd. Labelê ame eşkerakerdene ke numayîşê welatijan dewam keno.
