Belgefîlmê ‘’Bîra Sûrê’’ şahîdîya dewrêkî keno ke hetê edîtoranê Ajansê Mezopotamya ra Azad Altayî dîrektorîya ci kerda.
Qezaya Sûrî ya Amedî de serranê 2015-2016î de qedexeyê tebervejîyayîşî amebi kerdene. 6 taxan de 2015 ra heta 2022yî dekewtiş û vejîyayîşê taxan qedexe bibî. Qedexeyî wedarîyayî la narey Sûr de vîro komelkî ame hedefkerdene û awanîyê tarîxîyî ameyî rijnayene.
Sûr de goreyê raporê TMMOB’yî 3 hezar û 569 awanîyî ameyî rijnayene. Herinda nînan de sey zîndanan awanîyî ameyî viraştene û pêşkêşê sermayedaran ameyî kerdene.
Belgefîlmê ‘’Bîra Sûrê’’ qalê nê kerdişan û taxanê ‘’neweyan’’ keno. Belgefîlm de yeno mojnayene ke vîro komelkî senî ameyo rijnayene.
Dîrektorîya belgefîlmî hetê Azad Altayî ra ameye kerdene û Komeleya Rojnamegeran a Dîcle Firatî û dîrektorê Produksîyonê PEL’î Veysî Altayî û xeylê rojnamegeran zî hetkarîya belgefîlmî kerde.
