Beşdarê deklarasyonê Înîsîyastîfê Komelkî yê Seba Ziwanê Kurdkî dîyar kerd ke ganî dewlete heme heqanê ziman, kultur û hunerî yê şarê kurdî qebul bika û dîyar kerd ke eke waştişê dewlete est bo ke aştî bêra nê welatî ganî seba ameyoxî gamanê şênberan bierza.
Înîsîyatîfê Komelkî yê Seba Ziwanê Kurdkî seba waştişanê şarê kurdî yê derheqê ziwanê Kurdkî de bi îmza û beşdarîya 750 sazgeh, dezgeh, platform, partîyê sîyasî û derûdorê kurd û demokratîk ê komelkî yê vakurê Kurdîstan û Tirkîya Parka Ekîn Ceren ê qezaya Peyas a Amedî de bi hewayêko girseyî deklerasyonêko hempar raya pêroyî reyde pare kerd. Deklerasyon bi sloganê “Statuyê Kurdkî-Perwerdeyîyê Bi Kurdkî” raya pêroyî rê ame parekerdene. Hemverfekê Komîsyonê Ziwan, Kultur û Hunerî yê DEM Partî Heval Dilbihar û Hemsereka Komela Cigêrayîşanê Kurd a Stenbolî Remzîye Alpaarslan deerheqê deklarasyonî de ajansê ma rê qisey kerd.
Heval Dilbiharî dîyar kerd ke amancê înan o bingeyîn ê parekerdişê deklarasyonî o yo ke waştişanê şarê kurdî yê bakurê Kurdîstanî û Tirkîya yê derheqê ziwanê Kurdkî de raya pêroyî reyde parekerdiş bi û wina vat: “Eynê wextî de zî amancê ma o bi ke dewlete û rayedarê dewlete rê bidê zanayene. Şarê kurdî seba ziwanê maya xo çi wazenê? Waştişê înan çi yê? Ganî seba ziwanê Kurdkî çi bêro kerdene? Ma bi hewayêko zelal nê çîyê raya pêroyî û rayedaranê dewlete reyde pare kenê.”
‘Xeylê kerdişê ke vernîya ziwanê Kurdkî de asteng ê, est ê’
Heval Dilbihar îfade kerd ke ziwanê Kurdkî her çend encamê têkoşînê azadîya şarê kurdî de çinbîyayîşî ra amebo rizgarkerdene, estbîyayîşê xo heme dinya û dewleta Tirkîya rê dabi qebulkerdene zî, hema zî fermîyetî de, qanûnan de bi hewayêk nêyeno qebulkerdene û wina qisey kerd: “Bê statu yo, bê perwerdeyî yo, la reyna zî xeylê nameyê ke verê bi Kurdkî bîyê hema zî tirkî yê. Xeylê kerdişê ke vernîya ziwanê Kurdkî asteng ê, estê. Me veng danê qada mîyanneteweyî ke ziwano ke 50 mîlyon kurdan êdî mîyanê heme sazgeh û dezgehanê xo yê fermî û yê komelkî rê da qebulkerdene. Eynê wextî de dewleta Tirkîya zî ganî êdî bi hewayêko fermî qanûnê xo yê bingeyînî de statuyê Kurdkî û perwerdeyîya ziwanê Kurdkî û heme heqanê ziman, kultur û hunerî yê şarê kurdî qebul bikera.”
‘Ganî şarê kurdî seba waştişanê xo wirzo’
Hemsereka Komela Cigêrayîşanê Kurdî ya Stenbolî Remzîye Alparslanî waşt ke nasnameyê şarê kurdî qanûno bingeyîn de bêro qebulkerdene û wina vat: “Nê semedî ra ma nê deklarasyonî eşkera kerd. Proseso ke 27ê sibate de bi înîsîyatîfê Rayberê Şarê Kurdî Abdullah Ocalan dest pêkerd, heta roja ewroyîne ame. Ganî şarê kurdî zî seba waştişanê xo wirzo û hîna zaf bikero mîyanê têgêrayîşî û têkoşînê xo eşkera bikero. Hem hetanê bînan derûdorê nê waştişan de bîyaro têhet hem zî têkoşînêko xurt vejo orte. Bi nê munasebetî ke ma mîyanê nê înîsîyatîfê komelkî yê seba ziwanê Kurdkî de ca girewt. Seba statuyê ziwanê Kurdkî bêro ca, ganî ziwanê Kurdkî bibo ziwano fermî.”
