Parlamentera Şirnexî Newroz Uysal Aslan veng da şarî ke beşdarê çalakîya herêma Besta bibê û vat: “Bi wayîrvejîyayîşê xoza merdim eşkeno komel û herre azad bikero.”
Xozaya Kurdîstanî ser o bi serran o bi hewayêko sîstematîk û bi şerê taybet talanêk yeno kerdene. Nê talanê şerê taybetî serranê peyênan de bi taybetî xozaya Botanî ser o dewam keno. Viraştişê santralanê termîkî ra bigîre heta awbendê seba ewleyî, akerdişê kananê komirî ra heta cigêrayîşê bi dînamîtan ê petrolî. Bi destê cerdavanan çar hetî ra xozaya Şirnexî bîya hedefê dewlete. Vera nê talanî şarê Şirnexî do 9 û 10ê êlule de bi rayîrşîyayîş û Herêma Besta de vera talankerdişî do reaksîyon bimojnê. Parlamentera DEM Partî ya Şirnexî Newroz Uysal Aslan deeheqê talanê xozaya Şirnexî de ajansê ma rê qisey kerd.
Bi talanê xoza wazenê Kurdîstan veng bikerê
Uysal dîyar kerd ke bi talanî amancê dewleta tirke vengkerdişê Kurdîstanî yo û wina qisey kerd: “Nêzdîbîyayîşê talanê xoza heme dinya de bi destê polîtîkayanê kapîtalîst yeno kerdene. Ayn polîtîka Tirkîya de yena kerddene. Talanê xozaya Kurdîstanî yê heme cayî ra cîyayêr o. Seba ke nêzdîbîyayîşê hemverê şaristananê kurdan tena rant nîyo. Demo ke Kurdîstan de talan keno vano, ez do Kurdîstanî senî bêmerdim, bêkes verda.”
Feqirî û koçberîya şarî riyê talanê xoza ra yo
Newrız Uysal Aslan da zanayene ke dewlete bi talanê xoza vejîyena teberê qanûnan û qiseykerdişê xo wina domna: “Kurdîstan de serranê 1980î ra pey dest bi awbendanê ewleyî ame kerdene. Ewro feqirîya şarê ma, koçberîya şarê ma nê talanî reyde girêdaye ya. No talan bi kananê komirî dest pêkerd, ewro bi vetişê petrolî, cigêrayîşê madenanê cîyayan, bi birnayîşê daran dewam keno. Demo ke talan kenê zî heme qanûnanê papawitişê xoza binpay kenê. Xozaya Kurdîstanî de qirkerdişêk est o û no qirkerdiş şerê taybet reyde girêdaye yo. Şarê Kurd girêdayeyê xozaya xo yo. La seba pawitişê xoza çi lazim bibo ganî merdim bikero.”
‘Ma do bi çalakîyan xozaya xo bipawê’
Newroz Uysal Aslan tewr peyên veng da şarê Botanî ke bi girseyî xozaya xo rê wayîr vejîyê û vat: “No demêko derg o ke hetê talanê xoza de zîhnîyetê mojnayîşê reaksîyonî vejîyayo orte. Ganî no zîhnîyet hîna hîra bibo. Seba ke encax merdim eşkeno bi wayîrvejîyayîşê xoza komelêko azad, herrêka azade awan bikero. Şarê çend paştî bido xebatanê vera talanê xoza do pawitişê xoza zî hende vêş bibo. Ma heme şarê xo silaynenê wayîrvejîyayîşêko girseyî yê vera talanê xoza.”
