Dêrsimij Muzaffer Goktepe 20 serre xebatkarîya sendika kerda. Wexto ke komkiştena Garê Ankarayî bena o zî seba aştî û demokrasî uja de ro û giran birindar beno. Vano ke: “Ma a roje seba bariş û demokrasi şime. Ewro zî vana rindîye rinda, bariş, bariş, bariş.”
Dêrsimij Muzaffer Goktepe dewa Silîje ra yo. Polîtîkayê dewleteyê ke se serrîyo vera kurdan yenê ramitene nê polîtîkayanê qilêrinan ra Muzaffer Goktepe û keyeyê ey zî nesîbê xo girewto. Muzaffer Goktepeyî 20 serre binê sitara KESK’î de xebatkarîya sendika kerda. Wexto ke komkiştena Garê Ankarayî bena o zî seba aştî û demokrasî uja de ro û giran birindar beno. A roje ra nahetêrî her çîyê xo vurîno, bedenê xo ra astengdar maneno, kar û xebatê xo ra beno. Binê tesîrê a teqîne û vîndîkerdena hevalanê xo ra nêvejîno.
Muzaffer Goktepe reynazî kamilîya xo rameno. Heşarê rastîye û veraroja şarê xo yo. Wexto ke ajansê ma rê qisey keno binê waûbiratîye xêz keno vano ke: “Ma a roje seba bariş û demokrasi şime. Ewro zî vana rindîye rinda, bariş, bariş, bariş.”
Muzaffer Goktepe verî dewa xo ra kewno durî û seba naye wina vano: “Ma xeyle cenq dimê. Dewe de dûr mendi me. Bese ne kerdîme şerime dewe. Nêverdêne ke ma şime dewa xo. Tepîya, 2014 de va ke haştîyê yena. Zerê haştîye de tenê haştîye de mendime. Rind bî, delal bî. Ma peysêr şîme dewe xo. Yabanî verq û teyr û turî keyf kerdêne kê ma peysêr ameyme dewe. Şarê ma haştîye de rind bî.”
Ma Haştîyê ardene ser şîmê Ankara
Ma seba haştîye ameyme pêser îta ra 9 otobusî pir şîme Ankara. Ma seba haştîye îta ra kewtîme raye bi kayî û kêyfî şîme, çike ma bariş vaştêne, ma vatêne endî kes memiro, haştîye bibo. Şodîr bî, qomê ma her ca ra ameybî pêser. Ca çino ke tede bifetelîme. Kes ma sa nekerd. Amêyme pêser, olvozanê ma qovende kay kerdêne. Ez xorê jû banqî de nuştêne ro, mi nîyada ke je pûkele kê çîyê ame mi ser. Sênê mi deza, bi qerm. Kila adirî dorme gûreto. Bervayîş, zirçayîş zaf bi. Aqil sarê mi de nêbî.
Ma nahetra seweta çînay şîme, rastê çi ameyîme
Ma seweta haştîyê şîmê, ma îca de çi dî? 104 hevalê xo kerdî vîndî. Geganan a roje yena mi vîrî, dinara bena serdin şona. Handê olvozê ma şî, ma kesî ra tawa nêvat, cayê kesî nêguret, kesî de xiravin nêbîmê. Teyna haştîye vaşte. Na xiravîye çira amê ma ser. Ma na tiravma xo ser de nêeşta. Aqil sarê ma de nêmend. Bîme dirvetin, tepa karê xo ra eştî mê. Heşt serrî yo ke kar ra ama vetene. Reyna zî destê mi ra çi bêro ez kena.”
Ma handê dejî dî reyna zî vanîme haştîye
Muzaffer Goktepeyî emrê xo pêroyîn seba haştîye, waûbirayîye û demokrasî bêro nê hardan do ramitene. Na kamîye û kamilîya xo de israr keno û qesa xo peyênê wina girê dano: “Rindîye rinda. Haştîye, waûbirayîye rinda. Ma ceng nêwazenîme. Kes qarişê kesî nêbo. Zon û îtîqat sêr kam çitûr weşîya xo rameno henî biramo. Ma vanîme bariş, bariş, bariş. Bariş rind o.”
