Hemverberdevkê komîsyonê rêxistinkerdişî yê Partîya Herêmanê Demokratîkan (DBP) Huseyîn Bîrlîk derheqê merasîmê îmhakerdişê çekan ê PKK’î de ard ziwan ke na roje do bibo qonaxêka tarîxî û wina va: “Eger dewlete gamê huqûqî û sîyasî nêerzo, no proses senî aver şiro? Ganî gamê qanûnî û huqûqî bêrê eştiş.”
Serekê Şarê Kurdî Abdullah Ocalan 9ê Tîrmehî de vengdayîşê tarîxî kerd. Dima ra 26 serran, reya verêne bi vîdeo eşkerayî da. Na vengdayîşê Abdullah Ocalanî Kurdistan û dinya de veng da. PKK’yî 11ê Temuze de bi Koma Aştî û Komelê Demokratîkî ya ke 30 kesan ra amade bi, Silêmanîye de bi yew merasîmî çekî îmha kerdî û verpers da vengdayîşê Abdullah Ocalanî. Hemverberdevkê Komîsyonê Rêxistinkerdişî yê Partîya Herêmanê Demokratîkan (DBP) Huseyîn Bîrlîk derheqê prosesê ewroyênî de Ajansa Welatî rê qisey kerd.
Huseyîn Bîrlîkî ard ziwan ke ê do xeyalê Abdullah Ocalanî yê Aştî û Komelê Demokratîkî bîyarê ca û wina va: “Çi ke milê ma ser bikewo, ma do bikerê. Ma do rêxistinanê xo newe ra ronê.”
Huseyîn Bîrlîkî ard ziwan ke no proses do bibo wesîleya Komelê Aştî û Demokratîkî û va: “Erdê Kurdistanî de, bi taybetî zî Mezopotamya de, dima ra 2 hezar serran verî na erdî ser o yew şaristanî ronîya. Dinya de vila bi. 11ê Temmuze do şarê kurdî rê Rojhelatê Mîyanênî de û heme merdimanî rê bibo rojeka tarîxî. Çimkî vengdayîşê birêz Ocalanî seba aştî, wekîyetî, cuyayîşê pîya, komelê demokratîkî û aştîyane bibo, muhîm o. Hereketê Azadîye 50 serrî yo ke seba heqanê şarê kurdî, Rojhelatê Mîyanênî û heme merdiman têkoşîn dano. Ewro PKK no proses kerd yew hamleya bîne. Bi vengdayîşê birêz Ocalanî, gerîlayanê azadîya Kurdistanî bi 30 kesan çekanê xo vêşnayî. Na rojeka tarîxî ya. Seba ke proses aver şiro û problemê şarê kurdî çareser bibo, ganî heme beşê komelî sîyasetê demokratîkî de tewr bibê. Na qonaxêka eştişê çekan zaf muhîm a. Bi vengdayîşê Abdullah Ocalanî do yew qonaxa newîye aver şiro. Şarê ma verê televîzyonan merasîmê îmhakê çekan bi hestîyarî temaşe kerd.”
‘Komelê Aştî û Demokratîkî’
Huseyîn Bîrlîkî da zanayîş ke serranê ke PKK ronîya, verî şert û mercanê Sîyasetê Demokratîkî ser o ame ronayîş û va: “Birêz Ocalan senî ke serrê 90î de vatêne, ma yew muhatabî gênê, ewro fînî eynî çî vano. Eger na proses bi rayîrê ‘Aştî û Yew Komelê Demokratîkî’ nêra ronayîş û komel heme na proses de nêtewrîyo, do astengî fînî vejîyê. Kesê ke vanê ma sosyalîst û demokratîk ê, ganî ê zî wayîrê nê prosesî bivejîyê. Çimkî aştî bi tewrbîyayîşê şaranê prosesî pê yeno. Yanî Birêz Ocalan zî berpirsîyarî milanê xo ser girewte. Ewro ra dima bi çekan problem çareser nêbeno. Bi têkoşînê çekdarî ya 50 serran înkarê şarê kurdî wedarîya. Ma do nika ra dima sîyasetê demokratîkî aver berê. Ma do Aştî û Komelê Demokratîkî aver berê. Ganî şerî caye de sîyaset û huqûq aver şiro. Ganî komel zî no bar milê xo ser bîgiro. Ganî hêzanê mîyanneteweyî zî wezîfeyanê xo milê xo ser bigîrê.”
‘Rayîranê demokrasî û huqûqî ronê’
Huseyîn Bîrlîkî waşt ke gama ke PKK’yî eştî, hol bêro ercîyayîş û va: “Na destpêk ganî hol bêro ercîyayîş. Ganî hukûmet û serekkomar, bi rayedarê dewlete zî amadekarîya qanûnî aver berê. Eger ke bingeyê qanûnî pê nêrê, no komîsyon Meclîsî de nîno ronayîş do no proses senî aver şiro? Abdullah Ocalan û hereketa ci samîmîyet nîşan da. Ganî ma bingeyanê aştî, demokrasî û seyyewbînanî ser o amade bibê. Ganî verî Meclîs wezîfeyê xo pê bîyaro û qanûnan amade bikero.”
‘Ma rêxistinanê xo ronênê’
Huseyîn Bîrlîkî peynî de wina va: “Sey DBP’yî heta ewro ma senî seba Aştî û Komelê Demokratîkî hewl da, nika ra dima ma do zêdetir wayîrê vengdayîşî bivejîyê. Ma do heme meydanan de aştî aver berê û Komelê Demokratîkî rêxistin bikerê. Ma do xeyalê birêz Ocalanî yê Aştî û Komelê Demokratîkî rê bibê verpers. Ma do rêxistinanê xo newe ra ronê. Serkewtişî ra cîya çareserî çin o.”
