Parlementerê Agirî yê DEM Partî Heval Bozdag îdiayanê derheqê astengîya dîjîtalîzekerdişê berhemanê Kurdkî yê Sazgeha Berhemanê Destxetê ya Tirkîye berd rojevê Meclîse.
Parlamenterê Agirî yê DEM Partî Heval Bozdag îdiayanê derheqê astengîya dîjîtalîzekerdişê berhemanê Kurdkî yê Sazgeha Berhemanê Destxetê ya Tirkîye berd rojevê meclîsî. Heval Bozdag derheqê babete de pêşnîyazname hedre kerd û pêşkêşê Wezîrê Kultur û Turîzmî Mehmet Nurî Ersoyî kerd.
Binê nameye ‘Şarkîyatî’ de Kurdkî yena nimitene’
Heval Bozdagî pêşnîyaznameyî de bale ant koleksîyonê Aleksandre Jabayî ser ke wezaretî bi pesnîdayîşî çap kerdê. Ey dîyar kerd ke arşîvê sazgehe de nakokîyêka gird est a û vat: “Koleksîyonê Şarkîyatî de 130 berhemê katalogkerdeyî yê Kurdkî est ê ke hema nêameyê dîjîtalîzekerdene. Sewbîna nêzdîyê 300-400 berhemê Kurdkî zî paweyê katalogkerdişî yê û xebatê ke berheman ser o benê yenê astengkerdene.”
‘Cîyakarî û sansur dewam keno’
Heval Bozdagî dîyar kerd ke hetêkî ra mojnayîşê çend nimûneyan sey averşîyayîşî yenê pêşkêşkerdene û hetêkî ra zî cîyakarî û sansur dewam keno û vat: “Na rewşe eşkera kena ke polîtîkayê asîmîlasyon û înkarî yê tarîxî bi hawayêko cîya hema zî dewam kenê.”
Parlamenter Heval Bozdagî nê persî wezaretî rê kerdê:
*Hûmara pêroyî ya berhemanê Kurdkî yê envantera şima de çend ê û kamcî kitabxaneyan de yê?
*Gelo çend berhemê Kurdkî ameyê dîjîtalîzekerdene û cigêrayîşan rê akerde yê?
*Sebebê dîjîtalîzenêkerdişê berhemanê Kurdkî çî yo? Gelo qedexeyêko îdarî est o?
*Gelo mîyanê wezaretî de pisporanê ziwanê Kurdkî yê ke karê dîjîtalîzekerdiş û tasnîfkerdişê kenê est ê?
