Vervatoxê Platformê Şubeyanê Amedî yê Keskî Mehmet Nurî Ulusî dîyar kerd ke budçeya ke bi nameyê ‘polîtîkayanê asayîşî’ şerî rê yena kiştadayene, şar xizanêr kena.
Vervatoxê Platformê Şubeyanê Amedî yê Keskî Mehmet Nurî Ulusî ajansê ANF’î rê qisey kerd û da zanayene ke sînorê vêşanîye 6 hezar û 288 lîra, sînorê xizanîye 21 hezar û 208 lîra zêdîyayo.
Ulusî pare kerd ke se ra 99ê kedkarê umûmîye binê sînorê xizanîye de meaşan gênê. Ulusî dîyar kerd ke hêzê hêrînayîşî yê karmendan kêmîyayo û vat: ‘’Budçeya ke bi nameyê ‘polîtîkayanê asayîşî’ şerî rê yena kiştadayene, şar xizanêr kena. Eke merdim bala xo bido doneyanê enflasyonî ser vîneno ke meaşo asgarî binê sînorê vêşanîye de yo. Goreyê cigêrayîşanê ma yê pêroyînan sînorê vêşanîye 24 hezar lîra yo. Sînorê xizanîye resayo 80 hezar lîra. Budçeya şerî û rantî ra şar, weşîye û perwerdeyî rê budçe nêna kiştedayene.’’
Ulusî îfade kerd ke hûmara enflasyonî ya ke Dezgehê Îstatîstîkan ê Tirkîya (TUÎK) eşkera keno raşt nîya û vat: ‘’Dezgeh bi doneyanê îstatîstîkan kay keno û xîret keno ke ekonomî xurt bimojno.’’
