Hêrişê vera Rojavanî dewam kenê û çapemenîya dinya bale ancena ke piştîdayoxê nê hêrişan Tirkîya yo.
Ajansa xeberan a AP’yî ya Amerîka, bi datayanê Rêxistina Koçberî ya Mîyanneteweyî (IOM) agahî da ke 173.000î ra vêşêr kesî cayê xo ra bîyî.
Rojnameyê Die Zeit ê Almanya, protestoyo ke cinîyî porê xo apey danê vera birnayîşê gêsanê şervanan YPJ’yî kerd rojeve û bi nameyê “Nefret û porî” nuşte weşana.
‘Rojavan tena bi çekan vera DAÎŞ’î xover nêda’
Rojnameyê Il Fatto Quotidiano ya Îtalya bi sernameyê “Tecrubeyê demokrasîya Rojavanî binê tehdîtê Sûrîye û Tirkîya de yo” nuşte weşana û vat: “Rojavan atecrubeyanê sîyasî û komelkîyan ê tewr awarteyan ê serdemê ma ra yew o. Rojhelato Mîyanên de ke bi şeran, rejîmê otorîteran û tevgerê bingeperestan talan bîyo, Rojavan modelêkê komelkî yo radîkal cîya awan bîyo. Ewro no şoriş binê hêrişêko eşkera de yo.”
‘Hukmatê Tirkîya ra eşkera piştî gêna’
Derheqê rolê Tirkîya de wina ame vatene: “Na kampanyaya eskerîye hetê hukmatê Tirkîya ra eşkera piştî gêna; Wezîrê Pawitişê Neteweyî Yaşar Guler û Wezîrê Karê Teberî Hakan Fîdan berpirsîyarîyê sîyasî yê nê piştîdayîşî yê. Teyareyê şerî, dronî û teyareyê keşfî yê tirkan, waran ra hêzê cîhadîstan reyde hareket kenê.”
