Anqara – Goreyê agahîyanê ke rayedaranê DEM Partî ra ameyê girewtiş; çarçewaya qanûnî ê seba prosesê do badê kombîyayîşê NATO’yî bêro rojevê Meclîsî. Verkarê çarçewaya qanûnî zî yeno vatiş ke badê pêvînayîşan ra dima hewteyo ke bêro dîyar beno.
Prosesê Aştî û Komelê Demokratîk ke bi vengdayîşê Rayberê Şarî Kurdî Abdullah Ocalan 27ê sibate de dest pêkerd, rojevo sereke ê Vakurê Kurdîstanî û Tirkîya yo. Madeya verên ê prosesî viraştişê çarçewaya qanûnî yo. Badê peynîameyîşê xebatanê komîsyonî ê meclîsî çimê raya pêroyî zî meclîs de yê ke derheqê çarçewaya qanûnî de xebatî bêrê dest pêkerdene. La tewlê ke 4 aşmî raporê komîsyonî ser o derbas bîyî zî viraştişê çarçewaya qanûnî ser nîqaş û pêvînayîşî dewam kenê.
Hedrekerdişê çarçewaya qanûnî ser o Rayberê Şarê Kurdî Abdullah Ocalan zî bi raya heyetê DEM Partî pêşnîyarî partîyanê sîyasîyan rê kerdbi. Heyetê DEM Partî ê Îmralî zî derheqê hedrekerdişê çarçewaya qanûnî bi partîyanê sîyasî û Serekê Meclîsî Numan Kurtuluş reyde pêvînayîş kerdbi. Xebatê heyetê DEM Partî ê Îmralî zî na çarçewa de dewam kenê. Nê rojanê peyînan de munaqeşeyê hedrekerdişê çarçweya qanûnî ser o zêde bîyî. Anqara ra zî xeylî agahîyê viraştiş û hedrekedrişê ser o yenê parekerdiş.
Seba endamanê rêxistine û girewteyanê sîyasî do vurîyayîşê bêrê kerdene
Goreyê agahîyanê ke rayedaranê DEM Partî ra ameyê girewtiş; çarçewaya qanûnî do badê kombîyayîşê NATO’yî ê 7 û 12ê temmuze de do komîsyon de bêro erjnayîş û dima ra bêro rojevê Meclîsî û do sey qanûn vejîyo. Yeno vatene ke çarçewaya qanûnî, derheqê agêrayîşê endamanê rêxistine û veradayîşê girewteyanê sîyasîyan do rayîr verê tayê vurîyayîşan akero. Sewbîna çarçewaya qanûnî, do agêrayîşê sîyasetmedaranê kurdan ke xebatanê sîyasî ver surgunê welatanê Ewropa bîyî zî bigiro mîyanê xo. Çarçewaya qanûnî dîyar nîyo, la yeno texmînkerdene ke do rojanê ameyoxan de bêro eşkerakerdene.
Heyet do şêro Îmralî
Sewbîna rayedaranê DEM Partî dîyar kerd ke çarçewaya qanûnî ganî bi ewnîyayîşêko pêroyî bêro hedrekerdene, ne ke bi kategorîyan bêro sînordarkerdene û ganî çarçewa heme qonax û hetan ra çareserîyêke bîyaro. Goreyê agahîyêke yenê dayene, taslakê prosesî hewteyo bêro do hedre bibo. Badê pêvînayîşan zî do heyetê DEM Partî ê Îmralî seba girewtişê peşnîyaran ê Rayberê Şarê Kurdî Abdullah Ocalanî reyna şêrê Îmralî.
