Hemverfeka Komîsyonê Ziwan, Kultur û Hunere yê DEM Partîye Cemîle Turhalli, “Konferansê Girîngîya Yewîya Kurdan” de qisey kerd û va ke armancê înan pêardişê yewîye yo.
Rûniştişê verên ê Konferansê “Girîngîya Yewîya Kurdan” ke hetê Însîyatîfê Yewîya Demokratîkî ra Bazîdê Agirî de yeno viraştiş, dest pê kerd. Rûniştişê verên de nuştox Îhsan Colemêrgî, sîyasetmedar Îkbal Dûrre û Hemverfeka Komîsyonê Ziwan, Kultur û Hunere yê DEM Partîye Cemîle Turhalli bi moderatorîya Îlhan Tan, babetê “Tarîx de Bêtîfaqîya Kurdan û Netîceyê Aye” nîqaş kerdî.
Verî nuştox Îhsan Colemêrgî qisey kerd û cîhan ra mîsalî û qiseyê şexsîyetê girdî yê serê yewîye ardî ziwan. Îhsan Colemêrgî da zanayîş ke kurdan hemû cîyanê xo yê sîyasî de bi eşîretî hereket kerdî û tîfaqêk ava nêkerdî.
Îhsan Colemêrgî va ke yew semedê binkewtişê kurdan bawerîya kurdan û desthilatê înan ê û wina va: “Ol, têkoşînê mîyane şaran de çekêkê giran o. Eke bawerîya binkewte û serdestan yew bo, çekê olî destê serdestan de yo. Ez û keyeyê mi paştê nê prosesê newî danê û ez wazena verê neteweyî bêro berzkerdiş. Ganî hemû sîyasetmedarî, DEM Partî û temsîlkarê partîyanê bînan amadekarîya kongreyêka neteweyî bikerê.”
Hemverfeka Komîsyonê Ziwan, Kultur û Hunere yê DEM Partîye Cemîle Turhalli Kirmanckî (Zazakî) qisey kerd û bal ant ser semedanê bêtîfaqîya kurdan.
Cemîle Turhalli wina va: “Bêrê ma tîfaqa xo zereyî ra ava bikerê. Tîfaq her ca de est ê; xozaya ma de zî tîfaq est a. Eke tîfaq her ca de est ê, çira kurd tîfaqan nêvirazenê? Kurdistan herrayêka bêsînor o. Ma Lozan de dîyê ke hêzanê hegemonîkan Kurdistan parçe kerdî. Tarîxê temamî de, heme kurdan xeyalê yewîye kerdî, la aye qet pê nêameya. Armancê ma yo yewane o yo ke ma yewîya xo misoger bikê.”
Herî peynî sîyasetmedar Îkbal Dûrre qisey kerd û va ke bêtîfaqî tena mîyanê kurdan de nîya, mîyanê xeylê şaranê cîhanî de est a.
