Kurdistanijan Cenevre de verê bînaya NY’yî de vera tedayanê serê Kampa Multecîyan a Şehîd Rûstem Cûdîyî vengê komelê mîyanneteweyî da ke cade mudaxele bikero.
Kampa Multecîyan a Şehîd Rûstem Cûdîyî ya Mexmûrî binê ablûqa û ambargoyê dewleta Iraqî de ya. Kurdistanijan derheqê babete de dosyayêke daye Komîserîya Berze ya Multecîyan a Neteweyanê Yewîyayeyan (UNHCR) û waşt ke wa komîserîye erkanê xo bîyara ca.
Dima verê bînaya NY’yî de mîtîng ame kerdene. Mîtîng de sîyasetmedar Nurettîn Turgutî qalê rewşa kampe kerd.
Bariş Yamanî nameyê ciwananê Mexmûrî ser o qisey kerd.
Eşkerayîye de nê çîyî ameyî waştene:
-Ganî temsîlkarê kampe yê ke tepişîyayê vera bidîyê.
-Ganî statuyê multecîtîya sîyasîye bêro dayene roniştoxanê kampe.
-Wa ablûqa û ambargo biqedê.
-Ganî nasnameyê bêrê newekerdene.
-Ganî hukmatê Iraqî meseleyan bi dîyalogan çareser bikero.
Kurdistanijan vengê komelê mîyanneteweyî û NY’yî da ke wa cade mudaxeleyê ambargo û ablûqaya Mexmûrî bikerê.
