Çetîn Arkaş ke pîrozkerdişê rojbîyayîşê Rayberê Şarê Kurdî Abdullah Ocalanî yê Amara de qisey kerd ke ewro nuqtaya sifirî yê kurdan o û vat: “Endî merheleya ke ma resayê ci qonaxê eştişê gaman a. Çîyêko bibo dîyar o. Ganî bilez azadîya Serek Apoyî bi ca bêro. Serek Apo seba xo ney la seba şar û komelî xebitîya.”
Rojbîyayîşê 77. ê Rayberê Şarê Kurdî Abdullah Ocalan hetê hezaran kesan ra keyeyêko Abdullah Ocalan tede maya xo ra bîyo, dewa Amara ya qezaya Xelfetî ya Riha de yeno pîrozkerdene. Hezar kesî ke qezaya Xelfetî ra bi rayîrşîyayîş kewtî rayîr, resayê dewa Amara û bi resayîşê girseye pîrozkerdiş destpêkir. Keyeyo ke Abdullah Ocalan tede maya xo ra bîyo bi fotografanê Abdullah Ocalanî ame xemilnayene. Sewbîna zî girseye bi pankartêko ser o “Bi Rayberîya Azade Ver bi Yewîya Neteweyî ya Demokratîke” amebî nuştene akerd. Mahsum Karaoglan û Mustafa Dag ke 4ê Nisane 2009 de seba pîrozkerdena rojbîyayîşê Rayberê Şarê Kurdî Abdullah Ocalanî de netîceyê hêrişê cendirmeyan de ameybî qetilkerdene, Fotografê Înan ameyê berzkerdene.
Pîrozkerdiş bi qiseykerdişê Çetîn Arkaş ke demêke Girawa Îmralî de Rayberê Şarê Kurdî Abdullah Ocalanî reyde mend bî badê 32 serran amebî veradayene dewam kerd. Çetîn Arkaş wexto ke dest bi qiseykerdişî kerd girseye bi yew vengî sloganê “Bijî Serok Apo” berz kerd.
‘No ca nuqtaya sifirî yê şarê kurdî ya’
Çetîn Arkaş destpêke qiseyê xo de rojbîyayîşê Rayberê Şarê Kurdî Abdullah Ocalan pîroz kerd û wina dewam kerd: “Rojbîyayîşê Serekîr rojbîyayîşê şarê kurdî ya. Ma îta ra heta girawa Îmralî Rojbîyayîşê Serekî pîroz kenê. Seke yeno zanayene îta de Gobeklîtepe esto û no ca nuqtaya sifirî yê tarîxî ya. No ca zî nuqtaya sifirî yê şarê kurdî ya. Rayber Apo wexto ke qalê tarîxî xo keno vano; extîyarêke mi ra vat kurdî darêka huşkê xo pê înan meşgul meke. La nika dara huşke zergûn bîya û bîyê daristanêk. Verê cû kurdî tena komelêko keyeyî û eşîrî bîyê. Nokakîyê girdî mabênê kurdan de estbî. Tarîx de mîsalê ey estê, la ewro kurdî keyeyî ra wetêrî bîyê neteweyêk.”
Girse wextê qiseykerdişê Çetîn Arkaş de sloganê “Rojava Rojhelato Kurdîstan yew welat o” berz kerd. Naye ser Çetîn Arkaş vat; Rayber Apo zî vano şarê kurdî yew o.”
‘Selamê ma dayîka Uveyş ra’
Dewamê qiseykerdişê xo de Çetîn Arkaş ard ziwan ke na cografya hete netewe û bawerîyan ra zengîna û wina vat: “Rayber Apo tu wext pirîm nêda neyartîya şaran. Rayber Apo eya kurdî û Kurdîstanî yo la eynî wextî de ereb o, tirk o û armenîyo zî, Ma kokê xo dûrî nêkewenê la tu netewe û bawerîyan zî çinê nêhesebnenê. Ma îta de selam û hurmetê xo dayîka Uveyş ke temsîla îlaheyan bî kenê. Ewro cinî bi paradigmayê Rayber Apoyî ver bi azad bîyene û îlaheyan ra şinê.”
‘Ma Kurdîstanêko bê Serekî nêwazenê’
Çetîn Arkaş balê ante serê krîz û kaosê Rojhelatê Mîyanên û wina dewam kerd: “Rindekîya Rojhelatê Mîyanên bi azadîya cinîyan mumkun a. Serek Apo 27 serrîyo binê tecrîdî de yo. Nê 27 serran de seba xo çîyêke nêkerdo. Seba şarê xo, şaran û komelî xebitîyayo. Serok apo rastê tecrîdêke çetin ame û bi heqaretanê giranan ra rî bi rî mend. Heme kesê ke heqaret kenê la îmkanê ey cewabdayîşî çinêbî. La nêeşkenê roja ma qirêj bikerê. Sebebê tecrîdê 27 serran zî hevaltîya ma ya kemîya. Na seba ma şermêko girdo. Her saeta ke Serek Apo uca de yo ma rê şerm o. Ma ra persenê ‘Vanê şima vatena serekî kenê?’ ma vat eya. Vatêne ma şima ra vajê, ma do Kurdîstan bidê şima la şima Serekî xo vîr ra bikerê. Ma zî vat; ma Kurdîstanêko bê Serekî zî qebûl nêkenê.’ Endî Merheleya ke ma resayê ci qonaxê eştişê gaman ê. Do se bibo dîyar o. Ganî bilez azadîya Serek Apoyî bi ca bêro. Gama yewine na ya. Ganî şertê Rayber Apoyî bêrê başkerdene. Gama dîyina zî azadîya Serok Apo ya. Endî ma nêwazenê tena posteranê ey bivînê. Ma wazenê ey bivînê û vengê ey bihesnê.”
Çetîn Arkaş dîyar kerd ke Rayberê Şarê Kurdî Abdullah Ocalan do qetî bêro Amara û vat: “Dayîkêke bîbî ma ra vatêne ‘Serek apo do çi wext bêro’ tirkmene bî. Vatêne gul û beybûnî do akerê Serek Apo zî do bêro.’ Ma zî vanê xover bide dayê, xover bide. Serek apo do qetî bêro Xelfetî.
Rojbîyayîşê ma hemînan pîroz bo.”
Badê qiseykerdişê Çetîn Arkaş programê pîrozkerdene bi qiseykerdişan dewam kerd.
