Kombîyayîşê Pêroyî yê Însîyatîfê Yewîya Demokratîke de Hemsereka DBP’î Çîgdem Kiliçgun Uçare qisey kerd û wina va: “Eke ma yewîya xo awan nêkê do hêriş zêde bibê.”
Însîyatîfê Yewîya Demokratîke bi slogana “Em ê bi ruhê yekîtiyê bi ser bikevin” (Ma do bi ruhê yewîye ser bikewê) Kombîyayîşê xo yê Pêroyî yê Asayî yê 2ine, Eywana Konferansî ya Alî Emîrî ya Şaredarîya Bajarê Girdî ya Amedî de viraşt. Hemsereka DBP’î Çîgdem Kiliçgun Uçare kombîyayîş de qisey kerd. Çîgdem Kiliçgun Uçare verê qiseyê xo Fermandarê Asayîşî yê Helebî Zîyad Halep û şervana cinî Denîz Çîya yad kerd.
Hemsereka DBP’î Çîgdem Kiliçgun Uçare bale ante vengdayîşê Rayberê Şarê Kurdî Abdullah Ocalanî yê 27ê Sibate ser û va ke Ocalanî semedê demokratîkbîyayîşê dewlete veng dayo la dewlete cewab nêdayo.
‘HSD hêzê pawitişê şarî yo’
Uçare va: “Dewlete nêwazena kurdî bibê wayîrê statuyî û heqanê xo bigîrê. Rojawan nika binê hêrişan de yo. Eke ma yewîya xo awan nêkê, do nê hêrişî zêde bibê û giranêr bibê.” Uçare cewab da kesê ke vanê HSD “terorîst o” û wina domna: “Kesê ke cinîyan rê tecawuz kenê û merdiman veşnenê terorîst ê, HSD nîyo. QSD hêzê pawitişê şarî yo.”
Tîryakî: Kurdî do nê qirkerdişan xo vîra nêkê
Wekîlê Êlihî Mehmet Ruştu Tîryakîyî zî va ke prosesê aştîye bi hawayêko bêadalet rayîr ra şino; Ocalan gamî erzeno la dewlete gamê nêerzena.
Tîryakîyî bale ante hêrişanê Helebî (Şêxmeqsûd û Eşrefîye) ser û va: “Hêrişê vera kurdanê Helebî, kurdan de şikîyayîşêko pîl ê hîsî viraşt. Kurdêko ke ameyo destbendkerdene, hîrê rojî dima qelbê ci ameyo vetene û çimê ci ameyê vetene; tu kurdistanij do nê wehşetî xo vîra nêkero. Ma dî ke Vakur, Rojhilat û Rojawan de têna bi yewîye ma eşkenê şarê xo û şaristanê xo bipawê.”
