Endama Konseya Raberdişî ya KJK’yî Çîgdem Dogu dîyar kerd ke proseso ke Rayberê Şarê Kurd Abdullah Ocalanî 27ê adara 2025î de da destpêkerdene, resayo noqteya xetimîyayîşî û vat: “No proses tena dewlete rê nêro caverdayene. Şar ganî wayîr vejîyo.”
Endama Konseya Rayberdişî ya KJK’yî Çîgdem Dogu bernameyêka taybete ya Medya Haberî de derheqê Prosesê Aştîye û Komelê Demokratîk û şîdetê komelkî yê Tirkîya û Kurdîstanî de erjnayîşê muhîmî kerdî.
Dogu dîyar kerd ke aşmêk o ke Rayber Apoyî reyde kombîyayîş nêamo viraştene û no xeterêko gird o: “Tu kes nêwazeno proses ver bi neyinî şêro. Ma zî nêwazenê. Rayber Apo zî nêwazeno. Ey seba nê prosesî kedêka girde daye. La seba çareserîye zî ganî gamê şênberî bêrê eştene. Rayber Apo ganî bi fîzîkî azad bibo, şertê ey ê xebatêka azade bibê û goreyê naye Rayberîye proses biramo.”
Doguye şîdet û qirkerdişê Tirkîya û Kurdîstanî netîceyê polîtîkayanê kolonyalîstan ê dewlete yê ser vinderte. Aye Gulîstan Doku ya ke Dêrsim de ame kiştene, sey qurbana zîhnîyetê kolonyalîst û faşîst û çeteyanê mafyayî yê ke mîyanê dewlete de estbîyayîşê xo dewam kenê, pênase kerde.
Dogu qirkerdişê mekteban ê Mereş û Sêwêregi zî erjna û vat: “Heta ke meseleya kurdî nêro çareserkerdene, qatîlan afirneno. Ganî dewlete naye xo vîra nêkero û bilez nêzdîbîyayîşê xo yê çareserîye aver bero. Eke welatêk problemê xo yê zereyî çareser nêkero, aver nêşino.”
Dogu îfade kerd ke 1ê Gulane şehîdanê Gulane ano vîrardene û 1ê Gulane sey rojêka çalakîyan a: “Şarê ma ganî wayîrê prosesî vejîyo, vera astengbîyayîşê ci mudaxele bikero. Na tena meseleya dewlete nîya. Wayîrvejîyayîşê komelî muhîmîyêka stratejîk a.”
Aye peynî de bale ante cînayetanê cinîyan ser o: “Heta ke keyeyî û hereketê cinîyan serebûdan dima nêkewê, faîlî nêyenê eşkerakerdene.”
