Cinîyî ke wayîrê Rayberê Şarê Kurd Abdullah Ocalan û waştişanê azadîye yê şarê kurd vejîyenê, venga her kesî da ke beşdarê Newroze bibê.
Do emserre Îzmîr de Newroze 22ê adare de bi sloganî “Raybero Azad Komelo Demokratîk” û “Seba Azadîye Newroza Komelo Dmeokratîk” Qada Gundogdu de bêra pîrozkerdene. Cinîyan dîyar kerd ke emserr do seba Rayberê Şarê Kurdî Abdullah Ocalanî şonê qadan û Newrozanê bînan ra cîya, bi coçêko pîl pîroz bikerê. Cinîyan seba tewrbîyayîşê Newroze vengda her kesî.
‘Adirbestêko yew hetî nêbeno’
Dayîka Aştî Hedîye Korkut da zanayene ke wa na Newroze biba Newroza aştî, seypîye, yewîye û azadîye û Newroza heme girewteyanê sîyasî pîroz kerd. Hedîye Korkut derheqê prosesî de qisey kerd û vat: “Ma bi vengdayîşê rayberê xo keyfweş ê. La adirbestêko yew hetî nêbeno. Ganî dewlete game bierza. La ma ewnîyenê ê hîna zaf hêriş kenê. Ma hemverê nê hêriş û qirkerdişan ê. Ma şer nêwazenê, ma aştî û seypîye wazenê.
‘Bi cil û belganê xo beşdar bibê’
Raybera Keyeyê Hunerî yê Jin Artî Belkis Suleymanoglu zî ard ziwan ke prosesêko tarixî ra vîyarenê û vat: “Na Newroze do biba Newroza aştî û azadîye. Ma zî do bi reng, veng û deyîranê xo qadan de bibê û adirî geş bikerê. Ma vengdanê heme cinîyan. Bi kincanê xo yê Kurdkîyan beşdar bibê û ma adirê Newroze pîya geş bikera”
‘Newroze wina asan nêameya nê rojan’
Vesîle Tûran ard ziwan ke 52 serrî yo Îzmîr de manenê û vat serranê 90î. De nimitkî Newroze pîroz kerdêne û vat: “Birayê mi nimitkî adir wekerdêne. La ewro ma bi rehetî pîroz kenê. Seba Kurdan Newroze muhîm a. Ma wazenê ciwanê ma bêrê Newroze. Newroze wina asan nêameya nê rojan. Ganî her kes beşdarê Newroze bibo.”
‘Wa dayîkê leşkeran zî bêrê Newroze’
Maşallah Ozmen dîyar kerd ke her serre keyeyê xo reyde beşdarê Newroze benê û wina dewam kerd: “Ma roşanê kurdan bi coş pîroz kenê. Ma her serre bi coş pêşwazî kenê. Ma cil û belganê xo xoradanê, gedeyanê xo ra danê. Newroza emserre muhîm a. Ma çareserîya meseleyê kurdî wazenê. Wa ne gerîla ne zî leşkerî bimîrê. Ma Newroze bi saya gonîya şehîdan bi saya raybertî dest vist. Wa dayîkê leşkeran zî bêrê Newroze û aştî biwazê.”
‘Seba cinîyan waştişê azadîye’
Marîa Agir zî dîyar kerd ke a Newroze de seba cinîyan aştî wazena û vat a Newroza herkesî pîroz kena.
Endama Meclîsê Cinîyan ê DEM Partî ya Îzmîrî Gul Ekîcî zî ewnîyayîşê xo ardî ziwan û dîyar kerd ke bi serran o tewrê zilmê vera şarê kurdî zî tewrê Newroze bena û vengda heme cinîyanê têkoşeran ke Newroze de bêrê têhet.
