Platformê Derûdor û Weşîye, Xozayî, Dêrsim de vera qirkerdişê xoza Meydanê Seyîd Riza de mîtîngêk kerdbi. Cinîyê ke beşdarê mîtînîgî bîyê, vengê xo kerd yew û dîyar kerd ke ê seba erd û asmênê xo, koyanê xo ameyê tîya û do wayîrvejîyayîşê welatê xo ra fek veranêdê.
Platformê Derûdor û Weşîye, Xozayî, Dêrsim de vera qirkerdiş û talanê xozayî, bi sloganê “Ma do rayîr nêdê talanê. Ma do serkewê, cuye do serkewa.” Meydanê Seyîd Riza de mîtîngêk organîze kerdbi. Xeylê rêxistin û kesî beşdarê nê mîtîngî bi. Mîtîng de seba wayîrvejîyayîşê xoza mesajê girdî vejîyayê orte. Cinîyê ke beşdarê mîtînîgî bîyê ajansê ma rê mesajê xo îfade kerdê.
‘Verê ju gil bîme, nika bîme hezar gil’
Yildiz Kenlîça 90 serra welatê xo rê wayîrvejîyayîşî ser o û wina vana: “Ma seva birê xo, seva awa xo, seva jar û dîyar û mezelê xo, lac û domanê xo, no welat yê pîyê kalikane ma ra ma rê mendo, kesî rê nêverdenîme. Ma elewî me, ma Sêwas, Mareş û Dêrsim de qir bîme. Nê qirkerdişan xo vîr ra nêkîme. Verê ju gil bîme, nika bîme hezar gil. Azê ma ra her kes ame qirkerdene, kes nêmend. Ju pelga poyîne xo rê wayîr vejîme. Jar û dîyar, ko, dewe, awe… pero gonîya gencanê ma bîyê hît. Çem ra awe nê, gonî ameyêne.”
‘Paştî bîdîme jubînî’
Menekşe Çetîn, ê yê ke yenê welat kenê dirbetin, înan ser o wina vana: “Ma madenan welat de nêwazenîme. Ma şarê Dêrsim ra vanê, welatê xo rê wayîr vejîyê. Jar û mezelane xo rê wayîr vejîme. Meşte, bîro, awa ma nîna simitene. Bese nêkenîme baxçe biramîme. Kes bese nêkeno çîye rind boro. Maden kî ame, her ca beno qefçil û jehrin. Ma kî paştî bidê jubînî, kes ma ra tawa nêvano êdî.”
‘Dêrsim welatê ma yo, wayîr vejîme’
Hedîye Yeter şarê xo rê vana ke: “Maden nêwazenîme, destê ma ra welatê ma cenê. Xoza çin ba ma zî çin ê. O semed ra ma do heta peynî xover bidê. Dêrsim welatê ma yo. Ne wazenîme xozayî xirabin bikerê.”
‘Wa jar û dîyarê ma binê madenî de nêmano’
Besê Bal, qiseykerdişê xo de bale ancena encamê madenan ser o û wina vat: “Koyê ma de towa nêwazenîme. Dewe ma Bokir o, verê dewa ma de wazenê ke maden bikerê. Maden ke virazê, koyê ma, jare ma, hêga û bone ma sonê. Ma ke bar kerd, ameyîme, a dewe de wazenê ke, cayê maden bikere. Rind ke şarê ma yeno, paştî danê jubînî. Hîn bi kere ke, ma ûnca şêrîme jarê xo, dewa xo, ma verê koyê Bokire de bîme. Wazenîme ke ûnca şêrîme jarê xo.”
