Kayê şanoyî yê bi nameyê “Vîtrîn” ke bi derhênerîya Mardîn Zamanî yeno kaykerdene, bale anceno têkoşînê cinîyêka ke gêrena xo û vera çîyêk zî apey game nêerzena.
Cinîyêk bêters û bêpoşmanîye heme astengîyan vîyarnena… Nê prosesî de her çî, heta xîyanetî zî ceribnena labelê reyna zî tira fekveranêdana û gamêk apey nêerzena. Nê rayîrî de canê xo zî ronena orte; seba çîyanê ke seba aye muhîm ê, çendîye kalîte rê tercîh kena. Seba aye yo esas o yo ke çiqas nêzdîyê amancê xo bîya.
Her qonaxe de astengî giranêr benî la a hîna qerardar bena û nê tena îradeyê aye xurt kenê. Kayê şanoyî yê “Vîtrîn”, mabênê rojanê 21-30’ê teşrîna verêne de her roje saete 18:00 de sehneyê Enstîtuya Huneranê Rindekan a Keynekan de vejîyeno vera temaşekerdoxan.
Kayê “Vîtrîn” de Mehsa mexdûrêk nîya; viraştoxa çarenûsê xo ya. Şano bi kaykerîya Sarîna Touranî, Elnaz Hosseînî, Reza Feraqî, Arşam Rezaeî, Kosar Hosseînî, Saheb Yousefî, Heja Heyderî, Parsa Şîrî, Mobîn Ehmadî, Erşad Minoueî, Keyhan Bobanî, Parsa Amînî, Parand Moazemî, Mehsa Esfandîarî, derhêner Mardîn Zamanî û viraştişê Rohan Rezaqî ame pêşkêşkerdiş. No eser, hetê temaşekeran ra bi germî ame pêşwazîkerdiş û rexnegiran ra zî reaksîyonê pozîtîfî girewtî.
Goreyê xebera JINHA’yî “Vîtrîn” berhemê xebata di serranê ekîbî yo; keda hempar a kaykeranê ciwan û mezûnanê tîyatroyî yo. Esero ke tewrê mîzahê sîyayî de raştîye reyde têmiyan bîyo no fin keyfweşîya kûklayan nê, nîşaneyê dejê komelî yo. No dej tecrubeyo hempar ê heme emr û cînsan o la mesajo ke mîyanê nê dejî ra virazîyeno, mesajê sereronyaîşî nîyo, heta ke bireso amancê xo yê têkoşînî yo.
‘Rixmê hemû zehmetîyan zî ma serkewtî’
Kaykere Mehsa Esfendîarî, derheqê rolê xo de wina vana: “Ez 19 serre ya û serra 2020’î ra nata ez şano reyde eleqedar bena. Provayê ‘Vîtrîn’î sere ra bi şêwazê atolye bîyê. Provayan derhêner Mardîn Zamanî reyde 22 heta 25 aşmî dewam kerdî. Rixmê heme zehmetîyan zî ma kayî pêşkêş kerd. Zengînîya hîs û hunerî yê şarê ma, ma zaf keyfweş kerdî; paştîdayîşê înan motîvasyonê ma yo tewr pîl bi.”
‘Hêzdayîşê şarî hunerî keno gandar’
Kaykere Mehsa Esfendîarî, bal ant zehmetîya na xebata tîyatroyî ser o û dewamê qiseykerdişê xo de wina vat: “Na xebate seba ma zaf zehmet bîye. Ne prova û ne zî salona ma ya sehneyî est bîye la ma bi yewbîyayîşê ekîbî reyde aver şîyê. Ma mabênê rojanê 21-30’ê na aşme de kayê xo pêşkêş kenê û eleqeyê şarî zaf hêvî da ma. Heskerdişê şarî hunerî gandar keno; aye ra mi zî hunerî weçîna. Ez hêvî kena hîna zaf merdimî rîyê xo bidê tîyatro, çimkî tîyatro yewin hunerê çîyan o ke a game yenê ciwîyayene.”
‘Şîyayîşê heta peynî’
Mehsa Esfendîarî derheqê kayî de îfade kerd ke mîtolojî ra karakterî girewtî û wina qisey kerd: “Ma ‘Vîtrîn’ de tay karakterî û homayê mîtolojîyê rojhelatî sey Crowley, Paîmon, Rowîna şuxulnayî. Ez rolê ‘Mehsa’ kay kena. Rolê cinîyêka ke rayîrê xo weçînayo û wazena heta peynî şîra. Bi hetkarîya embazanê xo Lîlî û Lou, hewl dana ke xeyalê xo yê dayîşê konserê gîtarî bîyara ca. Amancê aye şîyayîşê heta peynî yo. Sere de mi têkilîronayîşê karakteran de zehmetî antî la dima mi fam kerd ke Mehsa tena peyê çîyanê de ya ke înan heq kena. Ez hêvî kena ke ez zî cuya xo de biba ‘Mehsaya Vîtrînî.'”
‘Cinîyêka ke seba ke biresa amancê xo her çîyî dana verê çimanê xo’
Derhêner Mardîn Zamanî ke eynî wext de karakterê “Lou” kay kena, tedeyî û amancê kayî ser o vindert û wina vat: “Rexneyê hunerî de hewt prensîbê bingeyînî est ê; înan ra yew zî femînîzm o û mi nê eserî de bal ant nê çîyî ser o. Hîkaye, behsê cinîyêk kena ke, seba ke biresa amancê xo her çî gêna çiman.”
