Rojnameger Mûtlû Civîroglû derheqê roniştişê “Ameyoxê Sûrîya û Sîyasetê Amerîka yê Badê Prosesê Beşar Esadî” yê ke hetê Komîteyê Têkilîyanê Teberî yê Kongreya Amerîkayî ra ame viraştene bale ante babetê ke kombîyayîş de ameyê qisey kerdene ser o û vat: “Kongreya Amerîkayî kurdan û heqanê înan xo vîr ra nêkena, la ganî kurdî zî estbîyayîşê xo Washîngton de xurt bikerê û bi ziwanêko tesîrdar hîkayeya xo vajê.” Civîrogluyî îfade kerd ke roniştişê kongre de rexneyê huşkî vera Şara û Tirkîya est bî.
Komîteya Têkiliyanê Teberî yê Amerîkayî kombîyayîşê “Ameyoxê Sûrîya û Sîyasetê Amerîkayî yê badê Prosesê Beşar Esadî” viraşt. Dimayê hêrişanê Rojavayê Kurdîstanî çend senatoranê Amerîkayî ke pêşengîyê înan Lindsey Graham keno, seba rewşa Sûrîya pêşnîyaznameyê, “Qanûnê Pawitişê Kurdan” hedre kerd û da naskerdene. Badê nê averşîyayîşan 10ê sibate de meclisê temsîlkaran ê Kongreya Amerîkayî kom bî û Sûrîya û şidetî herême ser o kombîyayîşêk viraşt. Nê kombîyayîşî de ame waştene ke “Qanûnê Pawitişê Kurdan” meclîsê Senatoyî de bêro qebulkerdene.
‘Kerdişanê wehşîyane yê hukmatê demkî ra nerazîyê’
Derheqê kombîyayîşî de Mûtlû Civîroglu seba ajansê ma qisey kerd û dîyar kerd ke Kongreya Amerîkayî heyetê temsîlkaran û heyetê senatoran ke 2 beşan ra pê yena û da zanayene ke no kombîyayîş hetê heyetê temsîlkaran ra ameyo viraştene. Mûtlû Civîroglu vist vîr ke heyetê temsîlkaran, komîteya sereke û çend komîteyê cêrînan ra pê yeno û wina vat: “No kombîyayîş hetê komîteya sereke ra ame viraştene. Komîteya sereke komîteya tewr muhîm a û serektîya aye zî komarperwerî ke nika îktîdar de yê, ê kenê. Kombîyayîş de babeta ke vejîyaya vernî nearamîya Sûrîya û hêrişê vera kurdan bî. Ma eşkenê vajê ke Washîngton de eleqeyêko gird seba rewşa Rojava û Sûrîya est a. Zafê qiseykerdoxan Şara û rayberîya ey rexne kenê û kiştiş ra, talan û kerdişanê wehşî yê Hukmatê Demkî ra razî nîyê.”
‘Şara ra vanê Colanî’
Mûtlû Civîroglû dîyar kerd ke Amerîka nika sersefîro verên yê Amerîkayî James F. Jeffrey û endamê komîteya polîtîkayanê komarperweran ê meclisê temsîlkaran Joe Wîlson rayberîya Colanî pawenê û hewl danê rexneyê ke est ê kêmî bikerê. Mûtlû Civîroglu binê aye xêz kerd ke zafê endamanê na komîteyî û pîsporê medenî bale ante rewşa krîtîk a Sûrîya û hêrişê vera kurdan ser o. Civîroglu dewamê qiseyê xo de vat: “Nê kesan kombîyayîş de behsê talûkeyê DAIŞ’î kerd û vat ke rayberîya Şara layîqê paştîdayena rayberîya Trump nêbîyê. Kombîyayîş de ame vatene ke ganî Amerîka kerdişanê hukmatê demkî bi huşk rexne bikero û bişopno. Sewbîna şikê derheqê caardişê peymane de zî zafê, Washîngton de ame waştene ke Amerîka çimdarîyê xo yê Sûrîya zêdetir bikero. Xeylê endamê kongre bi şik nêzdîyê Şara benê û tayê endamî hema zî ey ra vanê Colanî.”
‘Kongre hewl dana rewşa Sûriya rojevê xo de bigîra’
Dewamê qiseykerdişê xo de Mûtlû Civîroglu’yî dîyar kerd ke îktîdarê Amerîkayî bi kongre, Qesra Sipî û Mehkemeya Berze 3 beşan ra yeno pê û wina vat: “Qesra Sipî, Serek Trump û temsîlkarê ey ê Sûrîya zî Tom Barrak ê. Kongreya Amerîkayî teberê hewlê Senator Lîndsey Graham, mojna ke kongre nêwazena rolê xo yê çimdarî, şopdarî û rexnegirî destê xo ra verado. Kongre tim hewl dana ke rewşa Sûrîye rojevê xo de bigîra ke Şara û Tirkîya ser o tesîr bikero. Rexneyê zaf huşkî Tirkîya rê yenê kerdene. No zî mojneno ke kongre wazena rolê xo bi hewayêko aktîf û çalak kay bikera.”
‘Ganî kurdî sîyasetê DYA’yî hayîdar bikerê’
Mûtlû Civîroglû bale ante kemanîyanê sîyasetê kurdan ê Amerîkayî ser o û wina dewam kerd: “Kongre de temsîlkarê eyaletan û pisporê ke ameyê dawetkerdene, înan qisey kerd la kurdî çin bî. Çira ê pisporê ke ameyê dawetkerdene înan ra yew zî kurdî nêbi? Çira kurdî nê qonaxê hesasî de rolê xo kay nêkenê? Çira kurdêk kongre de hedre nêbi? Nê persî zaf muhîm ê. Ganî Rayberîya Xosere, rayberîya Rojava nê çîyan bivînê. Heta ke estbîyayîşê kurdan Washîngton de xurt nêbo, heta ke bi desan raporî nêşorê verê destê înan, heta ke ofîsê senatoran her roje nêrê zîyaretkerdene do sîyasetê kurdan zeîf bimano. Heme kombîyayîşê kongre gandar yenê weşanayene. Ganî nê dîmenî hetê rayberîya Rojava ra bêrê komkerdene û biaçarîyê ziwanê kurdkî. Ganî bêro vînayîş ke xeylê hetkarê kurdan est ê la wayîrê hayîyanê neweyan nîyê. No zî kurdan ser o maneno, heta wareyo dîplomatîk hetê kurdan ra Washîngton de nêro pirkerdene, heta ke kurdî derdê xo bi xo nêvajê zaf zehmet o ke kongre ser o tesîr bikerê. Nê hewlê ke yenê dayene bê kurdan ê, semedê sempatîya kurdan yenê kerdene.”
‘Prosesê viraştişê qanûnan zaf derg o’
Mûtlû Civîroglû behsê pêşnîyaznameyê, “Qanûnê Pawitişê Kurdan” zî kerd û qiseykerdişê xo wina qedêna: “Raya pêroyî ya kurdan de xelet famkerdişêk est o. Xeylê kesî texmîn kenê ke no pêşnîyazname do bêro qebûlkerdene û mîyanê rojan û çend hewteyan de bikewo pratîk. La wina nîyo. Amerîka de viraştişê qanûnêke bi aşman, bi serran dewam keno. No pêşnîyazname qonaxo verên o ke bibo qanûn, seba ey ma eşkenê sey verqanûn pênase bikerê. Viraştişê qanûnan prosesêko derg o. Seba serkewtişê prosesî zî ganî kurdî Washîngton de xurt bibê û dîplomatê amerîkayijî rast bêrê hayîdarkerdene. Kongreya Amerîkayî kurdan û heqanê înan xo vîr ra nêkena, ganî kurdî zî bi ziwanêko tesîrdar hîkayeya xo vajê.”
