Duran Kalkanî ke îfade kerd ke hêrişanê vera Rojava ra dima her cayê dinya û 4 parçeyanê Kurdîstanî de şar wirzîya lingan ser, dîyar kerd ke xoverdayîşê şarê kurdan newe ra dinya ser o tesîrdar bî.
Endamê Akademîya Zanistanê Komelkîyan a Abdullah Ocalanî Duran Kalkanî bi mûnasebetê serrgêra 27. ya Komployê Mîyanneteweyî yê 15ê Sibate Medya Haber TVyî rê erjnayîşî kerd.
Kalkanî vat ke Ocalan 27 serrî yo şertê tecrîdî de Îmralîyî de xover dano û sîstemê Îmralîyî “sîstemê tecrîd, îşkence û qirkerdişî” yo. Paradigmaya ke Ocalanî awan kerda peymê cîhanî de tesîrdar a û prosesê Haştîye û Komelê Demokratîk zî netîceya nê xoverdayîşî ya.
Kalkanî vat ke proseso ke bi vengdayîşê 27ê sibate 2025î dest pêkerdo, serrêk o ke dewam keno. Tayê pêdîyayîş û têmasî bîyî la hema netîceyêka şênbere û menda nêameya destgirewtene. Seba ke proses aver şêro, ganî Ocalan “şertê ciwîyayîşê azad û xebitîyayîşî” de bibo.
Kalkanî vat ke hêrişanê ke 6ê çeleyî de Rojawanî de dest pêkerd bi taybetî qewmîyayîşê Şêxmeqsûd û Eşrefîye ganî sey “komployo 2. yê 15ê sibatê” bêrê erjnayene. Nê hêrişan prosesê Haştîye hedêf girewtî. La şarê kurdî û dormeyê demokratîkî çar parçeyanê Kurdîstanî de û zaf cayanê dinya de bi çalakîyan reaksîyonê xo nîşan da.
Kalkanî qebul kerd ke Rojawan de zîyanê leşkerî û îdarî ameyî ciwîyayene la eynî wext de ruhê yewîya neteweyîye mabênê kurdan de bihêz bî û bi pêşengîya cinîyan xoverdayîşêko girs vejîyayo meydan. Pêkewtişê kurd-ereb nêbî û perspektîfê netewa demokratîke ameye pawitene.
Kalkanî vat: “Hêz ne çekan de yo ne zî pareyan de yo, hêz hişmendîye, cesûrîye û rêxistinebîyayîşî de yo” û veng da ke rêxistinebîyayîş û têkoşîn zêdeyêr bibo. Kalkanî vat ke Yewîya Demokratîke ya Kurdan bîya hewcedarîyêka lezabeze û ganî piştîpêdayîşê mîyanneteweyî zî girs bibo.
Kalkanî ard ziwan ke înanê ke vatêne ‘ma do kurdan parçe bikerê’ vatişê înan pûç vejîyayî û vat: “Bi taybetî na aşma peyêne de çîyê ke qewmîyayî, rêxistinbîyyaîşê şarê kurdî pê yew xebate zî nêameyêne kerdene. Ma tim fikirîyenê gelo ma çend bixebitîyê ma eşkenê naye bikerê, no qewmîya. No xi bo xo refleksê şarî bî.
