CPJ da zanayene ke 7ê teşrîna verêne ra heta nika tira 173 Filîstînijî pêro pîya 181 rojnamegerî hêrişanê Îsraîlî de ameyî kiştene.
Şerê Xezayî ke badê Hamasî 7ê teşrîna verêne ya 2023î de şer îlan kerd, hetê Îsraîlî ra ame dest pêkerdene, seba rojnamegeran bi texrîbatêko gird. Goreyê cigêrayîşanê Komîteyê Pawitişê Rojnamegeran (CPJ) ê heta 27ê gulana 2025î destpêkê şerî ra heta nika Xeza de Şerîa Rojava, Îsraîl û Lubnanî de teqez 181 xebatkaranê medya û rojnamegeran cuya xo vîndî kerda. No tablo serra 1992î ra heta nika ke CPJ dest bi arêdayîşê daneyan kerd, seba rojnamegeran demo tewr kiştox o.
Xezayî de rojnamegerî binê hêrişanê hewayî, xela, koçberîya nifûsî û rijîyayîşê se ra 80î yê awanîyan de, mîyanê şert û mercanê zaf tehlukeyînan de kar kenê. CPJ îdiayanê derheqê merg, girewtiş û birîndarkerdişê zêdeyê 130 rojnamegeran cigêrayîş keno la şert û mercê giran ê herêmî ver bi girewtişê agahîyan, beno asteng.
Goreyê daneyanê CPJ’yî 181 rojnamegeran û xebatkaranê medya cuya xo vîndî kerd, tira 173 înan Filîstînij, 2ê înan Îsraîlij û 6ê înan Lubnanij bîyî. Sewbîna 96 rojnamegerî birîndar bîyî, 2 rojnamegerî vîndî bîyî, 86 rojnamegerî zî ameyî girewtene. Ame eşkerakerdene ke hêriş, tehdît, sansur, hêrîşê sîber û kiştişê endamanê keyeyan zî mîyanê de zaf heqê rojnamegeran ameyî binpaykerdene. CPJ dîyar kerd ke heta nika teqez 17 rojnameger û 2 xebatkarê medya rasterast hetê hêzanê Îsraîlî ra bi hedefgirewtişî ameyî kiştene.
