HRANA’yî dîyar kerd ke mîyanê 24 saetanê peyênan de hêrişê Amerîka-Îsraîlî yê vera Rojhelatê Kurdîstan û Îranî de 53 kesî ameyê kiştene. Hûmara kesanê ke destpêkê şerî ra heta nika merdê, resaye hezar û 262 û mîyanê nînan de 200 gedeyî est ê.
Rêxistina Heqanê Merdiman a HRANA’yî bîlançoyê peyên ê şerê mabênê Îran û Îsraîlî de bi raporêk vila kerd.
HRANA’yî da zanayene ke 24 saetanê peyênan de hûmara merde û birîndaran bîya 53. Raporî de ame dîyarkerdene ke hêriş vera çatrayîrêkê Rayîrê Resalat ê Tehranî ser o ameyo kerdene û encamî de xeylê kesî merdê û xeylê kesî zî birîndar bîyê.
Goreyê nê raporî saetanê serê sibayî yê 9ê adare ra heta şandî, tewr kêm 17 sîvîlî cuya xo ra bîyê, 19 sîvîlî zî birîndar bîyê. Sewbîna encamê hêrişan de 8 hedîseyê mergan ameyê komkerdene labelê nêame zanayene ke kesê ke cuya xo ra bîyê sîvîl ê yan zî leşker ê, hema zî cigêrayîşî dewam kenê.
Raporî de ame dîyarkerdene ke destpêkê hêrişan ra heta nika 1262 kesî merdê û mîyanê na hûmare de 200 gedeyî est ê, 190 leşkerî ameyê kiştene û nasnameyê 335 merdeyan ser o hema zî cigêrayîşî dewam kenê.
