Dayîkanê Aştî yê Stenbolî peynî çalakîya xo ya vernîya sersefîrîya Sûrîye de eşkerayî daye û vat: “HTŞ DAIŞo modern o.”
Dayîkê Aştî yê Stenbolî çalakîyanê xo yê vera hêrişanê Rojava ser o bêmabên domnenê. Dayîkê Aştî 26ê çele de vernîya Sersefîrîya Îngilîstanî de, 27ê çele de vernîya Sersefîrîya Îsraîlî de, 28ê çele de zî vernîya Sersefîrîya Amerîka de eşkerayî daye û çelenga sîya vernîya berê Sersefîrî de ronaye.
Dayîkanê Aştî ewro çarçewaya çalakîyanê xo de vernîya Sersefîrîya Sûrîye de kom bîyê û sloganê “Bijî berxwedana Rojava” , “Jin Jiyan Azadî” û “Kujer Colanî” vatê.
‘Seba Filîstînî vengdayîş seba kurdan bêvengî est a’
Dayîka Aştî Feleknas Karabaş çalakî de dîyar kerd ke HTŞ, DAIŞo modern o û wina vat: “Wa dewleta Tirkîya çekan nêda HTŞ’yî. Bi destê dewleta tirkan, nê kiştişî benê. Gedeyê yenê kiştene. Tu qanûnan de çîyêko winayîn çin o. Şarê Tirkîya heqê Filîstînî wazeno la seba şarê kurdî çîyêk nêvano. Şarê kurdî bi desan serrî yo Rojava da xover dano. Badê nê wextî peyser şîyayîş çin o. Nê dewletê girdî wa nêvajê kurdî çinî yê, kurdî est ê. Sivîlî û gedeyî yenê kiştene, kezîyê cinîyan yenê qesnayene. Tu wijdan nê çîyî qebûl nêkeno. Ma kurdî heme ewro payan ser o yê heqê xo wazenê.”
Çelenga sîya ê şermezarkerdişî ya
Dayîkanê Aştî peynîya çalakîya xo de çelenga sîya a ke ser o ‘Em şermezar dikin’ amebi nuştene, vernîya Sersefîrî de rona. Çalakî bi vatişê sloganan qedîyaye.
