Nazdar Ataman û Hatîce Durmuş ê ke domanê înan 2021 de herêma Garê de hêrişê çekanê kîmyewîyan de cuyaya xo vînî kerdbî, waştî ke êdî rijyayîşê gonî bivîndero û aştîyêka qerardar bêro ca.
Rayverê Şarê Kurdî Abdullah Ocalanî 27ê Sibate de vengdayîşê “Aştî û Komelê Demokratîkî” da rayaumûmîye. Dima ra PKK’î Kongreya xo ya 12. viraşte û qerar da ke xo fesih bikero. Keyeyê cangorîyanê ke şer de cuyaya xo vînî kerdî, paştî danê vengdayîşê Abdullah Ocalanî û qerarê PKK’î.
Mabênê 10-14ê Sibata 2021î de Kamuran Ataman (Şoreş Beytuşşebap) û Ergîn Durmuş (Bawer Elkê) zî tede 14 endamê HPG’î herêma Garê ya Herêma Kurdîstanê Federeyî de hêrişê bi çekanê kîmyewîyan ê dewleta Tirkî de cuyaya xo vînî kerde. Kamuran Ataman 2004 de qezaya Şirnexî Elkê de tewrê PKK’î bîyo û sibata 2021î de herêma Garê de cuyaya xo vînî kerdo. Ergîn Durmuş zî 17ê Temmuza 2017î de tewrê PKKyî bîyo û o zî sibata 2021î de cuyaya xo vînî kerdo. Dayîka Kamuran Atamanî, Nazdar Ataman û dayîka Ergîn Durmuşî, Hatîce Durmuş behsê domananê xo kerd û derheqê pêvajoya ewroyî de qisey kerd.
‘Şoreş semedê dewaya xo fedayî kerd’
Nazdar Ataman behsê qijîya lajê xo kerd û wina va: “Şoreşî zaf hezê na dewaya kurdîye kerdêne. Şoreş semedê na dewa, xo fedayî kerd. Şoreş wendekar bi, wexto ke lîse wendêne, payîz bi, o û di embazê xo tewrê hereket bîyî. Şoreşî zaf bawerî na dewaye kerdêne û bi zerrî ra, bi eşq bi. Ma bi serberz ê. Semedê dewaya xo, şeref û namûsê xo û herra xo şîbi. Verî ke şêro her tim behsê partîye kerdêne. Zaf reyî vatêne ez do tewrê embazan bibo.”
Nazdar Atamane da zanayene ke wexto ke lajê aye û embazê ey bi çekanê kîmyewîyan cuyaya xo vînî kerda, înan televîzyonî ra eşnawito.
‘Ma zaf wazenê ke na gonî bivîndero’
Nazdar Atamane ard ziwan ke pêvajoya ke Rayverê Şarê Kurdî Abdullah Ocalan dayo destpêkerdene, ay zaf keyfweş kerdo û wina dewam kerd: “Ma zaf wazenê na gonî bivîndero. Êdî wa zerrîya yew dayîka bîne meveşo. Dayîkê polîsan bibo, yê eskeran bibo ferq nêkeno, ma dayîkî pêro pîya yew ê. Ma êdî nêwazenê zerrîya yew dayîke bivêşo. No pêvajoya ke Serekîye dayo destpêkerdene wa bêro ca. Heta nika zî dewleta tirkî hema yew game nêeşta. Ma wazenê ke na dinya aram bo, berê hepis û zîndanan abîyê û zerrîya yew dayîke meveşo. Ma wazenê aramîye bibo ke ma şîrê serê mezelê lajanê xo. Ma wazenê herra înan bivînê. Ma zaf wazenê ke aştîye bibo.”
‘Ma wazenê Serekê xo mîyanê xo de bivînê’
Nazdar Atamane waşt ke dewlete gamek rind bierzo ke dinya aram bo û nê çîyî vatî: “Wa no bêro ca. Ma wazenê aştîyêka qerardar biba ke ma ci ra emîn bibê. Ma wazenê Serekê xo, domananê xo mîyanê xo de bivînê. Semedê her kesî wa weşîye û herayî bibo, êdî bes o gonî birijîyo. Bes o zerrîya dayîkan bivêşo. Waştişê ma no yo.”
‘Ma nêwazenê ke zerrîya yew dayîke biêşo’
Hatîce Durmuşe zî ard ziwan ke lajê aye merdimêko zaf rehmîn û edaletîn bi û wina va: “Eşqa partîye wisa zerrîya ey de bîye ke nêzanayêne ka na dinya senî yêna û şona. Yew eşqo bêhesab zerrîya ey de bi.” Hatîce Durmuşe da zanayene ke înan televîzyon ra musayê ke lajê aye û embazê ey cuyaya xo vînî kerda. Hatîce Atamane nîşan da ke ê nêwazenê zerrîya yew dayîke bivêşo û waşt ke aştîyêk bêro ca ke herkes azad bo.
