Dayîkê Aştî yê Amedî hêrişê taxanê Şêxmeqsûd û Eşrefîye şermezar kerd û vat: “Serek azad nêbo aştî nêbena.”
Meclîsê Dayîkanê Aştî yê ke vera hêrişanê Şêxmeqsûd û Eşrefîye yê Helebî do şêrê Anqara, deklerasyonêk eşkera kerd û hêrişî şermezar kerdê. Dimayê eşkerakerdişê deklerasyonî endamê Meclîsê Dayîkanê Aştî derheqê azadîya Rayberê Şarê Kurdî Abdullah Ocalan û hêrişanê Helebî ser o ajansê ma rê qisey kerd.
‘Kênaya mi seba azadîya Serekî xo veşna’
Endama Meclîsê Dayîkanê Aştî yê Amedî Nezahat Teke îfade kerd ke heta ke Rayberê Şarê Kurdî Abdullah Ocalan azad nêbo ne Vakur, ne Başûr, ne Rojava, ne zî Rojhelat do azad nêbo û wina qisey kerd: “Lazim o ke Rayberê Şarê Kurdî bireso azadîya xo. Nêzdîyê 30 serrî yo Serek girewte yo. Heta Serek azad nêbo tu cayêk zî azad nêbeno û ma azadîya bêyî Serekî nêwazenê. Ewro çîyê ke yenê qiseykerdene zî çîyê ke vanê zî heme bi notanê ke Girawa Îmralîyî ra ameyê, destdayo ser û ewro ê notan ra ewnîyenê, qisey kenê, nêke nêzanê çar qiseyan vajê. Wa Rayberê Şarê Kurdî azad bibo, wa weşî û roşnîye heme dinya ra vila biba. Kênaya mi seba ke Serek binê tecrîdî de bi, bedenê xo veşna, xo veşna. Serek azad nêbo ez azadîya xo nêwazena. Ganî teqez Serek azd bibo.”
‘Wa şêrê hetê Serek û cewabêk bîyarê’
Endama Meclîsê Dayîkanê Aştî yê Amedî Makbule Ozbek zî wina vat: “Heta nika çimê ma tede bi ke do aştî biba. Dimayê babeta Rojava Serek rojev ra kewt. Kes behsê Serekî nêkeno, kes nêşono hetê ey, sebebê ci çî yo? Waştişê şarê kurdî, seba heme kurdan aştî yo. Ma bi pêro wazenê aştî biba, ma pêro wazenê Rayberê Şarê Kurdî bireso azadîya xo ya fîzîkî. Serek kilîtê aştî yo, heta kilît çin bo tu ber nêabeno. Wa zerrîya tu dayîke nêdeja. Ma şerê Rojavayî zî şermezar kenê. Ma şarê Rojava rê serkewtişî wazenê. Ê ke xover danê do serkewê.”
‘Bi azadîya Serekî aştî nêbena’
Dayîka Aştî Şadîye Hayme dîyar kerd ke azadîya Rayberê Şarê Kurdî Abdullah Ocalanî çareserîya meseleyan a û wina vat: “Serekî her tim aştî waşta, waşto ke şer biqedîno. Şarê kurdî zî her tim aştî waşta, wazenê zî. Ma sey Dayîkê Aştî nêwazenê gonî birişa. Ma Dayîkê Aştî her ca de têkoşînê aştî kenê. Ma wazenê destê xo bidê destê yewbînna la dayîkê leşker û polîsan demo ke gedeyê înan cuya xo vîndî kenê, vanê, “wa vatan weş bo” nêvanê wa şer vindero, demo ke gedeyê înan şîyê do pê “vatan” çi bikerê. Demo ke Serek resa azadîya xo ya fîzîkî do aştî biba, çekî do bi temamî bêrê ronayene.”
