Dayîkê Aştî yê ke vera herişanê taxanê Şêxmeqsûd û Eşrefîye yê Helebî ser o şîyê Anqara, vernîya Wezaretê Karanê Teberî yê Tirkîya de vera hêrişan reaksîyon mojna û vengdayîşê îstîfakerdişê Hakan Fîdanî kerd.
Dayîkê Aştî vera hêrişanê grûbanê çete yê girêdayeyê HTŞ û Tirkîya yê taxanê Şêxmeqsûd û Eşrefîye yê Helebî ser o şaristananê vakurê Kurdîstan û Tirkîya ra vizêr ver bi Anqara kewtbî rayîr. Dayîkê Aştî vernîya Wezaretê Karanê Teberî yê qezaya Çankaya ya Anqara ameyê têhet. Dayîkê Aştî tîya de pankartê ke ser o , “Em dayik rê nadin şer” nuseno girewt û dovîzî ke ser o “Rojava rûmeta me ye”, “Em şer naxwazin” û “Bijî berxwedana Rojhilat” nuştebi, girewtê û çelenga sîyaye hewanaye. EyNê wextî de dayîkan fotografê Zîyad Heleb girewt ke taxa Şêxmeqsûd de cuya xo vîndî kerdbî.
Dayîkî ke tîya de ameyê astengkerdene mîyanê dorpêçê polîsan de bêmabên sloganê, “Bijî berxwedana Rojava”, “Şehîd namirin”, “Em şer naxwazin aştiyê dixwazin” û “Bijî berxwedana Şêxmeqsûd” vatê. Destûr nêame dayene ke dayîkî şîrê berê Wezaretê Karanê Teberî ver.
‘Ma Hakan Fîdan dawetê îstîfakerdişî kenê’
Dayîkan tîya de eşkerayî daye. Eşkerayî de ewilî nameyê Dayîkanê Aştî ser o Havva Kiran qisey kerd. Havva Kiran îfade kerd ke ê seba aştî ameyê Anqara û wina vat: “Dayîkan rê tewr zaf gedeyê înan pîroz ê. Ma dayîkî seba gedeyanê tu dayîkan nêmirê tîya de yê. Tu kes qasê kurdan misilman nîyê. Cenazeyê cinîyêk awanî ra eşte war. No misilimantî nîyo. Ma Dayîkê Aştî tu hetê welatî de şer nêwazenê. Ma prosesêkê aştî ra vîayrenê. Ma vendganê rayedaranê Tirkîya; gedeyê kurdan pezê kardî ver nîyê. Ma vengdanê dewletanê mîyanneteweyî û Tirkîya ke nê şerî vindarnê. Feydeyê nê şerî tu kesêkî rê çin o. Ma vanê wa aştî û demokrasî bêrê awankerdene. Têkoşînî Anqara de dest pêkerd, çareserî zî do tîya de biba. Seba ney ma ameyê tîya. Ma wazenê şer vindero û aştî bêra û ma Hakan Fîdanî dawetê îstîfakerdişî kenê.”
‘Gonîya kurdan ser o bazarî mekerê’
Dayîka Aştî Emîne eren zî vengda rayedaranê Tirkîya û hêzanê mîyanneteweyî û vat: “Ewro şerêko hovane şarê Rojava ser o yeno kerdene. Ma kesanê ke nê şerî kenê şermezar kenê. Tirkîya ê çeteyî perwerde kerdê û erşawitê şer. Şerêko vera merdimîye yo. Ma ameyê ke Wezîrê Karanê Teberî reyde pêvînayîş bikerê. Wa o îstîfa bikero. Gonîya gedeyanê kurdan ser o planan keno. Ma vanê wa aştî biba. Ma şer nêwazenê. Ma gedeyê xo vîndî kerdê, ma nêwazenê gedeyê kesî bimirê. Dinya ma hemînan rê qêm kena. Vengdayîşê ma seba komelê mîyanneteweyî zî no yo; Colanî DAIŞ o. La Tirkîya paştî dana înan. Ma reyna vanê aştî. Ma ameyê ke pêvînayîş bikerê û vajê gonîya kurdan ser o bazarî mekerê.”
‘Quranî berz kenê û kurdan qetil kenê’
Raybera MEBYA-DER a Amedî Meryen Soylu zî dîyar kerd ke quranî berz kenê û gedeyanê kurdan qetil kenê û vat: “Heme kesî ke vanê ma merdim ê ganî nê zilmî qebul nêkerê. Ganî îmkan nêdê DAIŞ’î. Do siba heme dinya ser o vila bibê.”
Eşerayî bi vatişê sloganan qedîyaye.
Dayîkê Aştî Merkezê Komela Heqanê Merdiman (ÎHD) zîyaret kerd ke vera qirkerdişanê Helebî do hîrê rojî nobete bigîrê.
