Maya Şemeyî Feryal Çelîk û Dayîka Aştî Gulsum Dag dîyar kerd ke riyê dorpêçê Kobanî ra gedeyî dinyaya xo bedelnenê û vat: “Ma nêwazenê tu kes bêro kiştene, aştî çîyêka weş a.”
6ê çeleyî ra nat çeteyê HTŞ û SMO’yî hêrişê Rojavayê Kurdîstanî kenê, bi taybetî zî hêrişê Kobanî kenê. Çeteyî gede, cinî, extîyar û pîran kişenê. Kobanî hetê nê çeteyan ra ameya dorpêçkerdene. Kobanî de awe û ceyran ameyê birnayene. Riyê dorpêçî ra Kobanî de 5 gedeyan rîyê serdî ra dinyaya xo bedelnaye. Qamişlo de înan ra yew gede di kesan rîyê serdî ra merdê.
Hêrişê giran û zehmet ê vera dewanê Kobanî û Hesekê bêmabên dewam kenê. Hêrsê şarê kurdî û dostanê înan zî Kurdîstan û çar hetanê dinya de vera hêrişê qirkerdişî dewam kenê. Dayîkê Aştî zî her ca de vera hêrişan nerazîbîyayîş mojnenê.
Maya Şemeyî Feryal Çelîk û Dayîka Aştî Gulsum Dag ajansê ma rê qisey kerd û bale ant hêrişanê vera Rojava.
‘Gede û cinî yenê kiştene’
Feryak Çelîk dîyar kerd ke ewro Rojava de hêrişê qirkerdiş û giranî est ê û vat: “Her cayê Kurdîstanî de şarê kurdî ser o teda est a. Gede û cinîyî yenê kiştiş. La ma zanê ke eke hetkarî nêdayêne HTŞ’î, ê nêeşkayêne nê çîyan bikerê. Ewro DAIŞ hêzanê bînan ra cesaret gêno û hêrişê şarê kurdî keno. Rîyê dorpêçî ra gedeyî nêeşkenê biciwîyê û dinyaya xo bedelnenê. Ma nê hêrişan qebul nêkenê.”
‘Zaf çî kewenê milê ma ser’
Feryal Çelîk ard vîrî ke ganî ê wirzê û hetkarîya Rojava bikerê û vat: “Ewro sefereberîye est a, zaf çî kewenê milê ma ser. Ganî ma xover bidê. La bi yew di kesan nê ganî çalakîyî pêroyî bêrê kerdene. Seba ke ma piştî bidê şarê Rojava çalakî muhîm ê. Çike ewro gedeyî yenê kiştene, kezîyê cinîyan yenê qesnayene. Kezîyê şervananê ma şerefê ma yê. Ez wazena her kes paştî bido Rojava.”
‘Çend aşmî bi ke Rojava de aramî est bîye’
Dayîka Aştî Gulsum Dag zî îfade kerd ke a hêrişanê vera doman û cinîyan şermezar kena û wina vat: “Nê çend aşmî bi ke şer çin bî Rojava de. Şar mîyanê aştî de bi. La reyna hêrişan dest pêkerd. Ma aştî seba her kesî wazenê. Ewro domanî rîyê serdî ra dinayaya xo bedelnenê. Dayîkê Aştî aştî wazenê. Şer başîye nêdano kesî la aştî tesîrêko pozîtîf her kesî ser o kena.”
