Partîya Herêmanê Demokratîkan (DBP) bi munasebetê 1ê Êlule Roja Aştî ya Dinya eşkerayîyêka nuştekî pare kerde û vat: “Bêrê, ma vera şer û rijîyayîşî pîya xover bidê; têkoşînê demokrasî, edalet, azadîye û têduştîye pîl bikerê. Ma ameyoxê şaran ê hemparî bingeyê aştîye de awan bikerê.”
Eşkerayîya DBP’yî wina ya:
“Şaran tarîxê merdiman de bedelê şer û rijîyayîşan o tewr giran da. Şerê ke seba menfaetanê sermaye, netewe-dewletan, hêzanê emperyalîstan û yewdestanê çekan dîyayî, bi mîlyonan kesî kaş kerdî mîyanê xizanîye, koçkerdiş, merg û xeripîyayîşê komelkî. Ewro Fîlîstîn ra heta Sûrîye, Ukrayna ra heta Kurdîstan cografyaya hîraye de şerê ke ramînê, ameyoxê şaran kenê tarî. Oxina ke îradeyê şaran hetê şerî de nê, hetê aştîye de yo. Pêserîya merdimîye bingeyê azadîye û têduştîye de pîya ciwîyayîşê nasnameyanê cîya-cîyayan, şaran û bawerîyan mecbur kena.
Şarê kurdî bi serrano bedelê giranî dayî û estîya xo pawite, rixmê her tewr teda îradeyê xo ramit, ewro waştişê xo yê çareserîye û azadîye bi şeklêko hîna berz ramojneno. Têkoşînê şarê kurdî, têna seba azadîya xo nê, seba ke hemê şarê ke nê erdan de ciwîyenê, mîyanê aştîye û demokrasî de pîya vinderê zî dîyeno. Coka çareserîya persa kurdan a aştîyane û demokratîke têna semedê şarê kurdî nê, semedê ameyoxê tirkan, ereban, lazan, çerkesan, elewîyan, êzidîyan û pêro şaran ê hemparî zî wayîrê girîngî ya.
Nê konteksî de 27ê Sibate de vengdayîşê aştî yo ke bi destê Birêz Abdullah Ocalanî virazîya û gamê ke badê cû erzîyayî, seba şaranê ke nê erdan de ciwîyenê, bero tarîxî yo newî akerd. Vengdayîşê Ocalanî yo ke çarçewaya çareserîye û komelê demokratîkî de virazîya, yewna ramojneno de aştîya mende û cuya hempare mumkun a. No vengdayîş têna estîya şarê kurdî û heqê ci bi şeklêko qanûnî yenê garantîkerdene, ziwanê dayîke de perwerde, naskerdişê heqanê kulturkîyan û seba Ocalanî peydakerdişê şertanê azadan reyde mumkun beno.
Vera feraseto ke Tirkîya erzeno mîyanê şerî, zemînê aştîye û demokrasî de pîlkerdişê têkoşînî mesuldarîyêka komelkî ya. Ma 1ê Êlule Roja Aştî ya Dinya de veng danê: Bêrê, ma vera şer û rijîyayîşî pîya xover bidê; têkoşînê demokrasî, edalet, azadîye û têduştîye pîl bikerê. Ma ameyoxê şaran ê hemparî bingeyê aştîye de awan bikerê. Vera polîtîkaya şerî ya ke Rojhelatê Mîyanênî ra heta dinya vila bena, ma pêro pîya aştîye qezenç bikerê.
1ê Êlule Roja Aştî ya Dinya Fîraz Bo!”
