Partîya Têduştî û Demokrasîyî ya Şaran (DEM Partî) vengdayîşo tarixî yê Rayberê Şarê Kurd Abdullah Ocalanî ra pey dest bi zîyaretê partîyanê sîyasîyan kerdbî. Na çarçewa de heyetê DEM Partî MHP û AKP’yî reyde ewro kom bî.
Heyetê DEM Partî de Hemserekê Pêroyî yê DEM Partî Tulay Hatîmogullari û Tuncer Bakirhan, Serekwekîlê Meclîsî yê DEM Partî Sirri Sureyya Onder û Serekwekîla Grûba DEM Partî Gulistan Kiliç Koçyîgît ca girewt. Pêvînayîşan ra pey heyet Meclîsî de beyanat da.
Kombîyayîşî de ewil Hemserekê Pêroyî yê DEM Partî Tuncer Bakirhanî derheqê pêvînayîşê AKP û MHP’yî de qisey kerd. Bakirhanî ke pare kerd ke pêvînayîşan de “Vengdayîşê Aştî û Komelo Demokratîk” yê Rayberê Şarê Kurdî Abdullah Ocalanî ser o qisey kerdo û wina vat: “Ma ewnîyayîşê xo îfade kerdî. Her di partîyan reyde zî ma huqûqê aştî ser o qisey kerd. Ma derg û dila nê meseleyî ser o fikirîyayî ke ma eşkenê senî aştî nê erdî de mumkin bikerê.”
‘Ma îfade kerd ke ganî gamî bêrê eştene’
Bakırhanî qiseykerdişê xo wina doman: “Ma heta ewro 101 merkezanê pîlan de kombîyayîşê şarî kerdî û ma dînamîkê bînî yê komelî reyde kombîyayîşî kerdî. Malumatê ke ma nê kombîyayîşan de dest finayî, ma her di partîyan reyde zî pare kerdî. Kombîyayîşan û gêrayîşan de fikrê ke şarî vetê orte, tira waştiş û persê tewr verên demokratîk û gamê huqûqî bîyê. Ma nê zî partîyanê ke ma înan reyde kom bîyê, înan rê îfade kerdî. Şarî derheqê bicaardişê bawerî û temînatan de xeylê waştişê îfade kerdî. Ma zî her di partîyan reyde pare kerd ke seba silametîya nê prosesî gamê ke bawerî danê ganî bêrê eştene û seba ke proses dewam bikero hewcedarîyê ganî bêrê caardene. Ma îfade kerd ke eke gamî bêrê eştene, hem peynîya rîskanê globalî hem zî rîskanê herêmî de bi asanî bêrê pawitene. Ma nê meseleyan ser o munaqeşeyî kerdî.”
Dewamê ci do bêro…
