Rêxistina DEM Partî ya Îzmîrî, do gerreyê ê polîsan bikero ke ajanîye endam û temsîlakaranê înan ser o ferz kenê.
Rêxistina DEM Partî ya Îzmîrî derheqê cehdanê ajankerdişî yê polîsan de, awanîya xo de eşkerayîyêk daye. Gelekî kesî tewrê eşkerayî bîyî. Îdarekarê Şubeyê OHD’yî yê Îzmîrî Mehmet Yunus Çelîk eşkerayî de vat ke 2 hewteyanê peyênan de vera partîyan û wendekaran nêzdîbîyayîşêkê verahuqûqî yê sîstematîk kewto dewre. Çelîkî, dîyar kerd ke kesê ke xo sey polîs danê şinasnayene, qehwexaneyêkê qezaya Konakî de wendekarê unîversîte remnayî û tehdîtê terknayîşê şaristanî kerdo. Herwina dîyar kerd ke hemwelatiyêko ke newe zîndan ra vejîyayo, o zî ame remnayene, ameyo tehdîtkerdene û bi nê hawayî xebatê ajanîye serê ciwan û cinîyan de yenê ferzkerdene.
‘Walîyî înkar kerd’
Yunus Çelîkî vat ke ferzkerdişê ajanîye suc o û wina domna: “Nê cehdî sey sucê tehdîtkerdiş, heqaret, îşkence, bêparverdişê şexsî yê azadîye, xirab şuxulnayîşê wezîfe yenê hesibnayene. Wexto ke bi hewayêko sîstematîk bêro kerdene, beno sucê vera merdimîye. Pêvînayîşî de ke walîyî reyde bîyî, nê kerdişî ameyê înkarkerdene. Ma do vera nê kerdişan heqê xo yê huqûqî bixebitnê û mesela taqîb bikerê.”
‘Cinî û ciwanî yenê tehdîtkerdene’
Parlamentera Îzmîrî ya DEM Partî Burcugul Çubuk zî dîyar kerd ke hemserekê qezayan û kesê ke tewrê xebatanê partîya înan benê, yenê taqîbkerdene û wina dewam kerd: “Şubeyê Têkoşînê vera Terorî yê Emnîyetê Îzmîrî, cinî û ciwanî yenê tehdîtkerdene û wazenê înan bikerê ajan. Kesê ke tewrê çalakîyanê 8ê Adare û Newroze bîyî, rayîrê înan yenê girewtene, şinê qehwexaneyanê înan, telefonan kenê û tacîz kenê. Labelê çi bikerê zî, nêeşkenê ser bikewê.”
Parlamenterê Îzmîrî yê DEM Partî Îbrahîm Akinî zî vat ke badê pêvînayîşê walîyî tu cewabêko şênber înan rê nêameyo dayene, taye hêzê cîya yê mîyanê dewlete de wazenê endamê partîya înan krîmînalîze bikerê, êdî tehemûlê înan nêmendo û wina va: “Ez wazena bi taybetî nê vaja; destê ma de belgeyî est ê. Agahîyê înan, plakayê înan est ê. Ma do derheqê înan de muracatê sucdarîye bikerê. Belkî xo zaf xurt vînenê labelê wa biewnê aqûbetê walîyê Dêrsimî û lajê ey ra. Do eynî çi bêro sereyê şima zî. O ke şima kenê suc o. O semed ra tehdît û tedayanê ajanîye ra fek veradê. Nêke do nameyê şima yew bi yew raya pêroyî reyde bêro parekerdene û şima do teşhîr bibê. Ganî emnîyet û walîtî leze vernîyanê cehdan bigêrê.”
Vengdayîşê muracatî
Sereka Şubeyê OHD’yî ya Îzmîrî Fatma Demîrer zî ard vîr ke wexto ke polîsî çîyêk kenê, mecburê ke zabitnameyanê ci bigêrê û îmzea bikerê û veng da heme hemwelatîyan ke wexto ke yenê tehdîtkerdene û yan zî bêusûlîyêk vernîya înan de bena, bilez muracatê DEM Partî, OHD, ÎHD û sazgehanê bînan bikerê.
